ӦТКА ПӦТКА

А век на зэрӧ, век на зэрӧ,
Он тӧд, руд ывла коблас кор.
И гажтӧмысла асьтӧ неран,
Он интӧ аддзы, сьӧлӧм нор.

Вай, вильыш тӧвру, жбыркнит-волы,
Да кытшсӧ кымӧръяслысь разь.
Ме кымын лун нин ӧткӧн ола,
Дзик пон моз омлявны нин дась.

Оз тшай ни вина ышӧд ловтӧ,
И кывбур ки улысь оз пет,
Кор весиг ёртыдлы он ков тэ,
Сэк мустӧммӧ и вӧльнӧй свет.

Оз мунсьы аслам некод ордӧ,
Ӧд кортӧм гӧсьтыд ковтӧм дзик.
Тадз ӧтка пӧтка моза гортын
Ме бордйӧс косьта надзӧник.