ВИЧКО ЧУРКЙЫН

Дзик быд коми сиктын-грездын
Выйим радейтана места.
Кӧнкӧ луд выв, кӧнкӧ вадор,
Кӧнкӧ йӧзсӧ кыскӧ садӧ.

Но, а менам чужанінын
Медся лӧсьыд вичко дінын.
Джуджыд-джуджыд чуркйыс тані,
Войлань мышка, лунӧ бана.

Кыськӧ сьӧд кымӧр кӧ локтӧ,
Быть нин мунас кыркӧтш бокті.
Кымӧръяссӧ вичко вӧтлӧ,
Йӧз мед шер ни зэр эз тӧдлы.

Но, а кодзувъяса войӧ
Храмлӧн туган бисер койӧ.
Жыннян звӧныс лӧньджык лунӧ
Весиг Уллянаӧдз мунӧ.

Сиктса войтыр татчӧ волӧ,
Медым кыпалыштны лолӧн.
Кӧть нин здук мед асьтӧ кывны,
Лэбачӧн, да повтӧг сьывны.

Медым гора-гора йӧла
Лэбис гулыд мӧдлапӧлӧ.
Аддзывлыны югыд востым,
Кыдзи ворсӧ важ погостын,
Медым помтӧм мичсӧ тайӧс
Тэ пыр лыддин му выв райӧн.