МЫЖ

Мамлӧн керкаӧ киссьӧма поскыс,
Лымсӧ пыркнитны абу и роскыс.
Тӧлыс жугалӧм ӧшиньын дурӧ,
Вежынь трубаын саыс — кӧть курав.

А ӧд ловйӧн кор вӧлі на батьӧ,
Овмӧс кутчысис ладӧн и статьӧн.
Кодӧс мыжавны эндӧмсьыс колӧ?
Сӧмын миянӧс — гежӧда волім.

Волім, гортысь мед мыйкӧ да нуны,
Весиг аттьӧсӧ вунӧдлім шуны.
Мунӧм бать-мамлысь прӧщасӧ корны
Ӧні, грек вылӧ, челядьлы сёр нин.

...Паметь донаяс йылысь мед кольӧ,
Босьтчим дзоньтавны овмӧссӧ нёльӧн.
Сюся пелькӧдчим нёль чоя-вока,
Дойдіс сьӧлӧмъяс мыжным и шогыс.