ЭСКӦМ

Аръявыв арталан: уна-ӧ воас, мый кӧдзин,
Уна-ӧ градъясысь босьтан бур сьӧлӧмӧн пуктывлӧмтор.
Ставсӧ-ӧ тӧлкӧн да ладӧн, крестьянин моз вӧчин,
Медым эз нярзьы ни вужйыс, ни заыс, ни кор.

Путкыльтін эськӧ да жуглін торпыригӧдз мусӧ,
Куйӧдсӧ сюйин и йӧн-ёгсӧ нетшкалін пыр.
Медым сьӧд муыс эз пӧр гӧрдов лыаӧ, бусӧ,
Мудйысян лунтыр дзонь вежонысь дыр, мургиктыр.

Дзикӧдз нин локтас кор кӧдзасӧ идралан кадыс,
Казьтыштан, тыла кыдз ректыліс дзор Трипан Вась,
И Тима Веньӧс, код комилы дона и матыс,
Коді ас муыслы копрасьны вӧлі век дась.

Налӧн бур кӧдзаыс-петасыс ӧні на войтырсӧ вердӧ —
Сой вынтӧ, юр вемтӧ песӧмыд весяс эз ло.
Видзан тэ велӧдӧм-туйдӧмсӧ сьӧлӧмыд бердын,
Эскан: оз эжӧрсяв дӧзьӧра му уна во.