ВӦТ

Ме тайӧ войнас бара лэбалі,
Кӧть бордсӧ мыш сайын эг кыв.
То качлі енэжлӧн дзик лэбулас,
То вомӧналі вӧр-пу йыв.

А улын — парма лӧзӧн лӧсталіс,
И сійӧс вундіс Эжва от.
И весиг аддзи ордвуж чӧс туйӧс,
Быд ловъя лов, быд кодзувкот.

Быд турун сі, быд мича дзоридзыс
Мен ёна долыдмӧдіс син.
И батьлӧн вӧрса чомйыс дорӧдзыс
Эз радлун пактав и эз чин.

Ме кӧсйи копыр вӧчны керкалы,
Кӧн чӧжлі тӧлк, да лад, да бур.
Но весяс кушин весьтӧд бергалі,
Эз челядьдырӧй тані сюр.

Кӧн чера-пурта уджӧ велалі,
Кӧн ноп тыр чукӧртлі тусь-тшак,
Кӧн ягас пищальӧн на келавлі,
А ачым зырымбедь кодь шмак.

Кӧть кыдз эг чуксав визув пӧрасӧ,
Эз лэдз и воськовтны ляк бадь.
Эз пет и водзті моз важ пӧрасысь
Мен воча пестер кыскысь бать.