КОМИ ЖВАЧКА

Дедӧ вӧрса козин вайис,
Сарӧг кыша йӧнгыль тор.
На пӧ весав — видлы тайӧс,
Вомад мыйкӧ ковмас кор.

Абу юмов, дерт, кыдз «Орбит»,
Кӧдзыд — «Стиморолыд» моз.
Кажитчас кӧ, нӧшта кор пӧ,
Ме ог дойдав пожӧм-коз.

Ниа пулы копыртчывла —
Жвачка чӧскыдджык оз сюр.
Сійӧ пинь анъяслы, кывлы
Да и пытшкӧсыдлы бур.

Дерт, оз ёна нюжъяв, шлачкы
Синва войт кодь югыд чир.
Но мен мусмис коми жвачка —
Парма кӧра ниа сир.