ВЕРЗЬӦМӦН

— Данньӧ, данньӧ! — горзӧ Ваньӧ,
— Данньӧ, дед, и данньӧ, баб!
Джоджӧд биа-борда чаньӧн
Ризйӧ — удал да и тшап.

Ордйис пызан, ордйис лабич,
Ордйис кӧлуй видзан шкап.
Ылынӧсь нин дедыс-бабыс,
— Данньӧ, дедӧ! Данньӧ, баб!

Воис ӧдзӧс дорӧдз здукӧн,
Верзьӧмаыд оз тай ляб.
Сэсся ывла вылӧ тшукис.
— Данньӧ, дедӧ! Данньӧ, баб!

Коркӧ рытнас локтӧ кылӧ,
Посводз помын круп да крап.
— Мусӧ гӧгӧрті чань вылын,
Чолӧм, дедӧ, чолӧм, баб!