ЮРТӦМ ЮРА

Оз кӧ нинӧм разӧд-пазӧд,
Весиг висьмӧ юрыс.
Сійӧ ставлы — Ызі-базі,
Кӧть и нимыс Юра.

Гортас Ызі-базі ворсӧ,
Джодж пасьтала чача.
Шыблалӧма дзик быдторсӧ,
Колӧ мый, оз аддзы.

Мамлы отсасьӧ кор йӧрын,
Пуктасъяссӧ гудйӧ.
Ставсӧ керӧ-вӧчӧ бӧрӧн,
Йӧн да нявда мудйӧ.

Кодыр батькӧд чипас тэчӧ,
Пескыс бокӧ лэбӧ.
Чагсӧ, лӧпсӧ вайӧ сэтчӧ,
Медым тыртны лэбув.

Дурпоп моз жӧ урок вылын
Оз и ӧшйы инас.
Веськодь велӧдчӧмыд сылы,
Ӧвтыштӧма кинас.

Лешсьӧ, быттьӧ кольмӧм мазі,
Кисьтӧ, жуглӧ, дурӧ.
Збыльысь сійӧ Ызі-базі,
Некыдз абу Юра.