КЫЗЬ ВОЧӦЖСЯ ЛАЧАӦЙ

Кызь во сайӧ мунӧмӧн,
Кызь ва вомӧн вуджӧмӧн
Унатор нин вунӧма,
А ӧд кӧсйи кутшӧма
Ставсӧ кольны вежӧрӧ,
Да со тырис эжӧрӧн.

Кызь во кузьта вӧлӧкас,
Кызь верст джуджда саридзас
Воши томдыр йӧлӧга —
Пӧдтіс кадлӧн наридзыс.
Воши-пӧді муслунӧй,
Кодӧс эг чайт куслӧмӧн.

Кызь вочӧжся лачаӧй,
Кызь морт вылӧ вежлӧмӧй,
Каитча тай ачым ме
Мӧдъяс дорӧ кежлӧмысь.
Мӧдъяс дорӧ мунлӧмысь,
Кызь во кежлӧ вунлӧмысь.