ВОЙМИ

Со и войми. Вӧр керкаӧдз ылын
Веськыдавны коліс пемдандор.
Ӧні пешны ноддя, рӧкыд вылӧ,
Кок улысь ог аддзы сюмӧдтор.

А юр весьтын — югыд-югыд ордым,
Дзодзӧг-юсьлӧн войся лэбан пас.
Шургӧ, кылӧ, кельӧб лунвыв гортас,
Падмӧг сылы абу — нюр кӧть рас.

А юр весьтын — бовъялӧ виж тӧлысь,
Домсьыс мынӧм кокни ветки моз.
Кывтӧ сійӧ югыд ордым пӧлӧн
Лэбысьясыс бӧрся — и оз кос.

Вай жӧ кыптыв, мелань пӧльтысь тӧв ныр,
Ёнджык ӧвтчӧй борднад, дзодзӧг-юсь.
Гашкӧ, верма тӧлысь-пыжӧ сӧвны,
Вӧр керкаӧдз воны — туйӧй кузь.