БУКЫШ АР

Важӧн мӧй нӧ, помнита да, аръясас
Мӧдлапӧлын котрӧдлывлі таръясӧс?
Ӧти видзсянь мӧд видз вылӧ лэбзясны,
Думсьыс, кӧнкӧ, пищаляысь дзебсясны.
Пуксяласны, тӧда, кутшӧм пуясӧ,
Эг ӧд ӧтчыд таляв татчӧс туйяссӧ.
Сибӧдча лӧз кыдзьяс увті гусьӧник,
Косьӧбта — и крукыль бӧжыд усьӧ нин.
Ошйысьнытӧ яндзим, тар мый вайин тэ —
Рака мында вӧлі во-мӧд сайынтӧ.
Посводз джаджйӧ нопйӧс лӧня местита,
Мамлы чӧвта: прӧмыс, мися, эстӧнтӧ...
Нӧшта нин сэк небзяс мамлӧн сьӧлӧмыс:
— Шуда на тай, пиук, бара вӧлӧмыд...
Коли кадыс. Таво сэтчӧ муні да,
Кыйсян шудӧй менӧ быттьӧ вунӧдіс.
Аддзывлі жӧ эськӧ гоз-мӧд пӧткаӧс —
Лов эз сибӧд пищаляӧс, ӧткаӧс.
Эз и сюрлы нимкодясьны таръясӧн.
Казяласны — пыр жӧ вунӧ гаръясьӧм.
Тювгысясны пашкыр кыдзьяс вывсяньыс,
Муртса сӧмын жбыргӧм шыыс кывсьылӧ.
Збыль тай, сідзкӧ, ёна найӧ вӧймисны
Гоз-мӧд воӧн. Гашкӧ, йӧзсьыс йӧймисны?
Сиктсянь матын кымынӧн со лыйсьӧны,
Ме моза жӧ, кӧнкӧ, думсьыс кыйсьӧны.
Либӧ сыысь пӧтка кутіс повнысӧ,
Мыйла матын некӧн лои овнысӧ?
Кыйсян места мыйта вӧлі важӧн-ӧ?
А со ӧні гӧгӧр трактор-машина.
Кӧні койтіг таръяс вӧлі кургӧны,
Вына эстакадаяс сэн жургӧны.
Нюръяс пӧлӧн, байдӧгъяс кӧн сёйисны,
Йӧзыс тырмидз удобренньӧ койисны.
...Гортлань довги. Ачымӧс на янӧді:
Друг да кодкӧ веськалас мен паныдӧн?
Кильчӧ помын мамук сӧмын мыччысис,
Пывсянӧн да пызанӧн пӧ виччыся.
Мышкысь мамӧ тыртӧм нопйӧс личӧдіс,
Ӧттшӧтш нора мӧдлапӧлӧ видзӧдліс:
Талун пӧ тай поводдяыс дурмӧма,
Эз и сет пӧ сэсся сьӧлӧм бурмӧдны.
— Татшӧмнас нӧ эськӧ кутшӧм вӧралӧм?..
Лок нин пыр вай, няньсӧ важӧн шӧралі.
Ышловзьылі: — Збыль тай гӧльмис арыссӧ,
Лышкыдджыкнас лоас оз нӧ барасӧ?