УДАЛЛУН

Васьӧ кыйис крокодилӧс
Аслас Эжваысь, эз Нилысь.
Кило ветымын, дерт, лоас,
Ӧдва пыж дорӧдзыс воис.

Сідзи бӧжнас муткыльтӧ,
Тайкӧ пыжтӧ путкыльтас.
Бузӧбтас да камнитас,
Пелыснас кӧть амнитас.

Агас пиняс веськавны
Ен мед видзас эськӧ да.
Васьӧ лыа ділань
Кыскис крокодилӧс.

Ёртсӧ берег дорас
Отсӧг вылӧ корис.
Кыдз нӧ гортӧдз катӧдны,
Сэтчӧдз абу матын да?
Быдса сё джын кило
Тайӧ крокодилас.

Петан туйыс сюрис:
Сиктлань вӧла тюрис.
Ловъя краж пу кодьыс
Дыр зэв кыптіс доддяс.

Кӧть и пӧсьӧн мыссисны,
Бӧжыс муӧд кыссис на.
Со ӧд чери мыйсяма
Зонкаыдлӧн кыйсьӧма.

Сиктсаяс дыр шензисны,
Ас костаныс вензисны:
Збыль-ӧ Васьыс тайӧ
Крокодилӧс вайӧ?
Миян Эжва йирад
Абу татшӧм сирыд.

— Ӧні, дерт, нин абу, —
Васьӧ шуӧ тшапа.
— Ёс вылад ме сэсся
Кад ог вошты весяс.
Аски ветла юлань,
Кыя нин акула!