КОСМОНАВТ

Витя киын куим шар:
Гӧрд и лӧз, и сьӧдыс.
Витя миян таво ар
Космосланьӧ мӧдіс.

Кайис керка вевт вылас —
Джуджыдджык пӧ сэні,
Татчӧ коркӧ зэвтлӧма
Батьыс кузь антенна.

Ӧдӧбтыштчис, гӧнитіс
Дзик нин крыша дорас,
Сӧмын сэки звӧнитіс
Телепон, сё морӧ.

Космосад оз лэдзны пӧ,
Поводдяыс лёк пӧ.
Вай жӧ, пиӧ, лэччы пӧ,
Космодромас лок пӧ.

Эм ангар-сараяд пӧ
Телега-ракета.
Некоді эз сайӧд кӧ,
Сійӧс тэныд сета.

Ветлӧдлышт пӧ муӧдыс,
Космос — абу шутка.
Бать-конструктор шуӧ да
Емӧн шаръяс чуткӧ.