ГӦСЬТЪЯС

Рӧдтім-гӧнитім,
Ыджыд мамлы звӧнитім:
— Кыдзи олан? Регыд волам!
Тані карас гажтӧм бара,
Быдса гожӧм кежлӧ
Карсӧ сиктӧн вежлам.

Рӧдтім-гӧнитім,
Баблысь тӧжд-мог лӧньӧдім,
Гӧснеч вайим ӧти сайын,
Пасьтӧдім и вӧньӧдім,
Идрасим и пелькӧдчим,
Мартаыскӧд лелькуйтчим.

Рытнас кӧза йӧлӧн
Номсасьыштім чӧла.
Но, а дзик мӧдлунӧ
Мудйысьны нин мунім,
Ытшким на и сэсся —
Кад эг колльӧй весяс.

Рӧдтім-гӧнитім,
Пошта вывсянь звӧнитім:
— Мамӧ, папӧ, энӧ лябӧй,
Шондібанӧй, майбыр тані.
Гожйӧдчам и ворсам —
Слӧймам дзик быдторсӧ.
Сэтчӧдз тані олам,
Кытчӧдз оз кор школа.