СИНМӦН АДДЗЫТӦМ

Оліс-выліс ӧти салдат. Служитіс кызь вит во и лэдзисны сійӧс гортас. Локтіс сійӧ гортас и аддзӧ: рӧд ни вуж некод абу кольӧма, ставныс кувсьӧмаӧсь сы ветлігкості. Пуксис салдат туй бокӧ да пондіс шогсьыны: кытчӧ жӧ мунны, кытчӧ воштысьны. Локтіс сэк сы дінӧ кутшӧмкӧ пӧрысь пӧчӧ да шуӧ:

— Мый, служивӧй, шогсян?

Висьталіс сылы салдат, мый сідз и сідз: некытчӧ мунны и некытчӧ воштысьны.

— Эн шогсьы, — шуӧ, — служивӧй. Мун тэ Сьӧд ю дінӧ да аддзан сэтысь ассьыд шудтӧ. Вот тэныд шӧвк тупыль, тайӧ тупыльыс и нуӧдас тэнӧ Сьӧд ю дінӧ.

Босьтіс служивӧй старукалысь шӧвк тупыль, аттьӧаліс сійӧс и мӧдӧдчис туйӧ. Тупыль быгыльтчӧ сы водзвылын, а служивӧй вӧтчӧ тупыль бӧрся.

Мунісны да мунісны, мунісны да мунісны, коркӧ и Сьӧд ю дінӧ воисны. Сэк шӧвк тупыльыд дугдіс быгыльтчыны да сувтіс берегдорса ляк бадь пӧвстӧ, и служивӧй ляк бадь пӧвстӧ жӧ пырис да пондіс виччысьны, мый водзӧ лоӧ. Пуксисны сэк берег дорӧ куим юсь, тумельгасисны да лоины куим мича ныв. Сэсся пӧрччысисны куимнанныс да пырисны Сьӧд юӧ купайтчыны. Салдат сэк гусяліс ӧти нывлысь паськӧмсӧ да дзебис.

Вот купайтчыссис нывъяслӧн, петісны берегӧ. Кык нылыс пасьтасисны, бара тумельгасисны да лоины юсьясӧн и лэбисны, а коймӧд нылыс коли берегӧ да пондіс шуавны:

— Коді гусяліс менсьым паськӧмӧс? Том морт кӧ — жӧникӧн лоас, шӧр арлыда морт кӧ — дядьӧн лоас, пӧрысь морт кӧ — бать пыдди лоас!

— Ме том морт, — шыасис салдат.

— Шыбит, сідзкӧ, менсьым паськӧмӧс, сэк ме тэ дінӧ локта, — шуӧ нылыд.

Шыбитіс салдат нывлы паськӧмсӧ. Пасьтасис сійӧ, локтіс салдат дінӧ да шуӧ:

— Мун ньӧб, служивӧй, карысь керка, восьтав сійӧ керкасьыс став ӧшиньяссӧ, ме пыра тэ дінӧ ӧшиньӧдыд и сэк вӧлисти лоа тэнад гӧтырӧн.

Салдат вӧчис стӧч сідз, кыдз тшӧктіс юсьыд: ньӧбис карысь керка, восьталіс став ӧшиньяссӧ. Сэк ӧшинь пыр лэбзис керкаӧ юсь, тумельгасис и лои мича нылӧн. Гӧтрасисны найӧ и овмӧдчисны зэв бура том гозъя.

Дыр-ӧ, регыд колис кадыс, коркӧ кувсис сарлӧн гӧтырыс. Сар коли дӧвечӧн да пондіс шогсьыны. Пукалӧ ӧтчыд сар аслас ӧшинь дорын да шогсьӧ. Сэки вӧлі буретш мунӧ сы ӧшинь увті коктӧм манак да юаліс сылысь:

— Мыйысь нӧ шогсян, сар-батюшко?

— Кыдзи нӧ он шогсьы! Менам салдатлы сюрӧма мичаысь-мича гӧтыр, а ме сар, да менам абу гӧтыр!

— А тэ мырддьы салдатыдлысь гӧтырсӧ.

— Кыдз нӧ ме сылысь мырддя?

— Босьт, — шуӧ, — служивӧйӧс да ысты Сьӧд ю вылӧ, кытысь сійӧ аслыс гӧтырсӧ судзӧдіс. Сэні олӧ Гундыр. Медым ваяс служивӧйыд Гундырлысь сьӧлӧмсӧ. Тӧдӧмысь, сэтысь служивӧйыд ловйӧн бӧр оз во.

Кывзіс сар коктӧм манаклысь сӧвет да корис салдатӧс ас дінас.

— Вот, — шуӧ, — служивӧй, тэныд месянь служба. Ветлы Сьӧд ю дорӧ, ви сэтысь Гундырӧс, а сьӧлӧмсӧ вай меным лекарство пыдди. Вӧчан — наградита, а он вӧч — юртӧ керышта.

Шогӧ воис салдат. Локтіс гортас да висьталӧ гӧтырыслы, кутшӧм служба сылы сетісны.

— Тайӧ, — шуӧ сылӧн гӧтырыс, — абу служба, а ворсӧм, прамӧй службаыс лоӧ тэд водзын на.

Сэсся служивӧйлы гӧтырыс сетіс шӧвк тупыль, зарни чунькытш, стальнӧй пурт да шуӧ:

— Шӧвк тупыль тэнӧ Гундыр оланінӧдз нуӧдас. Тайӧ чунькытшсӧ чунькытшалан веськыд водз чуняд, кор Гундыркӧд паныдасян. А тайӧ пуртнас Гундырлысь сьӧлӧмсӧ перъян.

Петіс салдат туйӧ. Шӧвк тупыль быгыльтчӧ сы водзвылын — туй индалӧ, а служивӧй сы бӧрся вӧтчӧ.

Мыйӧн салдат муніс гортсьыс, сар ыстіс ассьыс слугаяссӧ, медым пышйӧдны гӧтырсӧ служивӧйлысь. Но муртса на воисны сарскӧй слугаяс служивӧй керка дінӧ, служивӧйлӧн гӧтырыс шыбитіс ӧшинь пырыс юсь кольк, и став керкаыс ортсысяньыс лои дорӧма весьт кызта кӧрт стенаӧн. Сарскӧй слугаяс мырсисны, мырсисны служивӧй керка дорын, но керка пытшкӧсӧ веськавны эз вермыны. Сідзи и лои налы мунны сар дінӧ куш киӧн.

А салдат муніс, муніс тупыль бӧрся да воис коркӧ Гундыр оланінӧдз. Петіс сылы воча Гундыр да шуӧ:

— Ас кокнад ваян, служивӧй, ассьыд юртӧ. Тэ локтін меным закуска вылӧ.

Уськӧдчис Гундыр салдат вылӧ, а служивӧй кыскис сэки зепсьыс чунькытшсӧ гӧтырыслысь, чунькытшаліс веськыд водз чуняс — Гундыр пласьтнитчис муӧ да кулі. Служивӧй перйис Гундырлысь сьӧлӧмсӧ стальнӧй пуртнас и мӧдӧдчис бӧр гортас. Воис гортас да сетіс сарлы виӧм Гундырлысь сьӧлӧмсӧ.

Сар абу рад служивӧй воӧм вылӧ и Гундыр сьӧлӧм вылӧ. Сійӧ бара пондіс шогсьыны да думайтны, кыдзи эськӧ служивӧйлысь мича гӧтырсӧ мырддьыны. Бара локтіс сар дінӧ коктӧм манак да шуӧ сылы:

— Эм свет вылын куим страшнӧй вок. Найӧ пыр ворсӧны чугуннӧй картіӧн. Ысты служивӧйӧс тайӧ чугуннӧй картіысла. Сэтысь сійӧ ловйӧн бӧр оз во.

Чукӧстіс сар бара служивӧйӧс ас дінас.

— Вот, — шуӧ, — служивӧй, тэныд месянь служба. Кӧнкӧ свет вылын олӧны куим вок-багатыр, пыр чугуннӧй картіӧн ворсӧны. Вай меным налысь чугуннӧй картісӧ. Вӧчан — награда сета, а он вӧч — юртӧ керышта.

Шогӧ воис салдат. Локтіс гортас да висьталӧ гӧтырыслы, кутшӧм служба сылы сетісны. А гӧтырыс сылы шуӧ:

— Тайӧ абу служба, а ворсӧм, прамӧй службаыс тэд лоӧ водзын на.

Сэсся служивӧйлы гӧтырыс сетіс шӧвк тупыль, шӧвк кузьчышъян да шуӧ:

— Шӧвк тупыль вайӧдас тэнӧ коланінӧдз, а шӧвк кузьчышъян пыр аслад сумкаын видз, кыскыв сійӧс сӧмын сэк, кор дзикӧдз пӧгибӧ воан.

Ӧтнасӧн коли служивӧйлӧн гӧтырыс, и сар бара ыстіс ассьыс слугаяссӧ пышйӧдны служивӧйлысь гӧтырсӧ. Но сійӧ дорис ассьыс керкасӧ кык весьт кызта кӧртӧн, и сарскӧй слугаяслы бара лои мунны куш киӧн.

А салдат муніс да муніс шӧвк тупыль бӧрся, коркӧ и воис ичӧтик керка дінӧ, а керкаыс петук чаль йылын бергалӧ. Пырис салдат керка пытшкӧсӧ и аддзӧ: пукалӧ сэні сэтшӧм мисьтӧм нывбаба, пиньясыс весьт кузя чурвидзӧны сылӧн. Сійӧ шуӧ салдатлы:

— Пань тыр вир, вом тыр яй меным воис! Вот ӧні ме тэнӧ и сёя!

А служивӧй сылы шуӧ:

— Первой верд да юктав туй мортӧс, а сэсся вӧлисти, колӧкӧ, сёй.

Салдат пондіс мыссьыны, а мисьтӧм нывбаба сылы сёйны лӧсьӧдны пондіс. Мыссис салдат, а мисьтӧм нывбаба сылы чышкысьны кузьчышъян вайӧ.

— Менам, — шуӧ салдат, — аслам гӧтырлӧн пуктӧм шӧвк кузьчышъян эм.

Кыскис салдат аслас сумкаысь шӧвк кузьчышъянсӧ да пондіс чышкысьны. А нывбабаыд тӧдіс тайӧ кузьчышъянсӧ да шуӧ:

— Ок, тэ, служивӧй! Мыйла нӧ тэ водзджык эн висьтав? Тэ тай вӧлӧмыд менам зять, ичӧт чойлӧн верӧсыс.

Толькӧ удитіс шуны тайӧ кывъяссӧ, и лои сійӧ мича нылӧн, кутшӧмӧн сійӧс аддзыліс служивӧй Сьӧд ю дінын юсьяс купайтчигӧн. Сэсся вердіс да юкталіс служивӧйӧс кӧзяйка, быдногыс сійӧс гӧститӧдіс.

Мӧдӧдчис салдат сэсся водзӧ. Муніс да муніс, муніс да муніс да ичӧтик керка дінӧ воис, керкаыс курӧг чаль йылын бергалӧ. Пырис салдатыд керкаӧ, а сэні кык весьт кузя пиньяса нывбаба пукалӧ да шуӧ:

— Пань тыр вир, вом тыр яй меным воис! Вот ӧні ме тэнӧ и сёя!

А салдат сылы шуӧ:

— Первой верд да юктав туй мортӧс, а сэсся вӧлисти, колӧкӧ, сёй.

Пондіс мисьтӧм нывбаба сёян лӧсьӧдны, а салдат мыссян доз дінӧ сувтіс. Мыссис салдат, а мисьтӧм нывбаба сылы чышкысьны ассьыс кузьчышъян вайӧ.

— Менам, — шуӧ салдат, — аслам гӧтырлӧн пуктӧм шӧвк кузьчышъян эм.

Кыскис салдат аслас сумкасьыс шӧвк кузьчышъянсӧ да пондіс чышкысьны. А нывбабаыд тӧдіс тайӧ кузьчышъянсӧ да шуӧ:

— Ок, тэ, служивӧй! Мыйла нӧ тэ водзджык эн висьтав? Тэ тай вӧлӧмыд менам зять, ичӧт чойлӧн верӧсыс.

И друг сійӧ лои мича нылӧн, кутшӧмӧн сійӧс аддзыліс салдат Сьӧд ю дорын юсьяс купайтчигӧн. Сэсся вердіс да юкталіс служивӧйӧс кӧзяйка, быд ногыс сійӧс гӧститӧдіс.

Сэсся мӧдӧдчис салдат водзӧ. Муніс да муніс, муніс да муніс, коркӧ и вӧр керка дінӧ воис. Пырис сэтчӧ, а сэні куим багатыр-вокъяс пукалӧны да чугуннӧй картіӧн ворсӧны. Мыйӧн аддзисны салдатӧс, куимнаныс уськӧдчисны сы дінӧ: ӧти — блюдйӧн, мӧд — пуртӧн, коймӧдыс — вилкаӧн да шуӧны:

— Пань тыр вир, вом тыр яй воис миянлы ас кокнас! Вот ӧні тэнӧ и сёям!

— Энлы, — шуӧ служивӧй, — ме тіянысь некытчӧ ог пышйы! Вайлӧ меным час джын срок тіянкӧд картіӧн ворсыштны.

Пуксис служивӧй картіӧн ворсны куим воккӧд да пырысь-пыр жӧ унмовсис сэтчӧ пызан саяс. Коли час джын и вокъяс чуксалӧны сійӧс.

— Вайлӧ меным ещӧ вит минута срок тіянкӧд картіасьыштны! А медым оз унмовссьы, ме мыськышта юрӧс да чужӧмӧс.

— Но, — шуӧ ыджыд вок, — ладнӧ! Сетам тэныд срок мыссьыны да ещӧ вит минута картіасьны.

Мыссис салдат да пондіс чышкысьны аслас шӧвк кузьчышъянӧ, а куим вок сэк тӧдісны тайӧ кузьчышъянсӧ да шуӧны:

— Ок, тэ, служивӧй! Мыйла нӧ тэ водзджык эн висьтась миянлы? Тэ тай вӧлӧмыд миянлы зять, ичӧт чойнымлӧн верӧсыс!

Вокъяс вердісны-юкталісны салдатӧс, ёна гӧститӧдісны да пондісны юасьны, кутшӧм могӧн ветлӧ служивӧй татчӧс местаясын. Салдат ставсӧ висьталіс, кыдзи да мый.

Вокъяс сылы и шуӧны:

— Тэнад, служивӧй, эм на кад аски асылӧдз узьны-шойччыны тані. Аски пажын кад кежлӧ тэ лоан гортад и верман сетны сарлы чугуннӧй карті.

Узис, бура шойччис салдат куим вок ордын. Мӧд лун асывнас ӧти вокыс тумельгасис да пӧри кутшӧ, пуксьӧдіс служивӧйӧс аслас мыш вылӧ и лэбӧдіс сійӧс гортӧдзыс пажун кад кежлӧ.

Нуис салдат сарлы чугуннӧй карті колода, а сар абу рад служивӧй воӧм вылӧ да чугуннӧй карті вылӧ. Сійӧ скӧралӧ, мый и тайӧ разын служивӧй некытчӧ эз пропадит. Пуксис сар аслас ӧшинь дорӧ да пондіс думайтны, кыдзи служивӧйӧс изведитны. А коктӧм манак быттьӧкӧ сэні и вӧлӧма, сійӧ юалӧ сарлысь:

— Мыйысь нин бара шогсян, сар-батюшко?

— Кыдз нӧ он шогсьы! Пыр на вот мездыся салдатысь, а сылы некутшӧм смерт абу!

— Ысты тэ служивӧйӧс Синмӧн аддзытӧмла. Сійӧс, тӧдӧмысь, служивӧйлы не корсьны.

Корис сар ас дінас служивӧйӧс.

— Вот, — шуӧ, — служивӧй, тэныд месянь служба. Кӧнкӧ свет вылын эм синмӧн аддзытӧм. Корсь сійӧс и вайӧд ме ордӧ служитны. Вайӧдан — награда босьтан, он вайӧд — юртӧ керышта!

Шогӧ воис салдат. Локтіс гортас да висьталӧ гӧтырыслы, кутшӧм служба сылы сетісны.

А гӧтырыс сылы шуӧ:

— Тайӧс вот и ме ог тӧд. Мун тэ менам вокъяс дінӧ да налысь юав. Сета ме тэныд туй вылад ещӧ бедь, зуд да сир тыра чуман, кор ёна пӧгибӧ воан, найӧ тэныд отсаласны.

Мӧдӧдчис салдат туйӧ. Мунӧ сійӧ воддза туйӧдыс: гӧтырыслӧн чойяс ордӧ пыраліс да куим багатыр вокъяс ордӧ воис. А куим вок сылы шуӧны:

— Тайӧс вот и ми ог тӧдӧй. Эстӧн, ыджыд вӧр пӧвстас, олӧ ӧти старик. Сійӧ зэв мисьтӧм, лёк, но, гашкӧ, мыйкӧ висьталас.

Муніс салдат вокъяс индӧм серти, аддзис вӧрысь керка да пырис сэтчӧ, а сэні сэтшӧм страшнӧй старик пукалӧ, мый видзӧдлынытӧ полан. Старик шуӧ:

— Пань тыр вир, вом тыр яй воис меным! Вот ӧні ме тэнӧ и сёя!

Кватитіс служивӧйӧс старик да веськыда пачӧ пондіс сюйны жаритӧм могысь.

А салдат сылы и шуӧ:

— Кыдзи нӧ тэ менӧ жаритны кӧсъян туй мортӧс. Лэдзлы первой менӧ мыссьыштны да вӧлисти сэсся сёй. Ме тэысь ӧні некытчӧ нин ог мун.

Пондіс салдат мыссьыны, а старик сулалӧ сы бӧр вылын кузьчышъянӧн.

— Меным, — шуӧ салдат, — тэнад кузьчышъяныд оз ков. Менам эм аслам гӧтырлӧн пуктӧм шӧвк кузьчышъян.

Пондіс чышкысьны салдат аслас шӧвк кузьчышъянӧ, а старик сылы и шуӧ:

— Ок тэ, служивӧй! Мыйла нӧ тэ водзджык эн висьтась меным? Тэ тай вӧлӧмыд зять, менам ичӧт нывлӧн верӧсыс!

Сэсся вердіс да юкталіс служивӧйӧс да пондіс юасьны, кутшӧм могъясӧн ветлӧ сійӧ тайӧ местаясын. Салдат висьталіс ставсӧ, кыдзи да мый. А старик и шуӧ:

— Синмӧн аддзытӧм йывсьыд и ме некор эг кывлыв. Но, энлы, гашкӧ, тӧдмалам!

Сійӧ жӧ войнас старик чукӧстіс ас дінас став лэбачьяссӧ да юалӧ налысь:

— Синмӧн аддзытӧм йылысь эн кывлӧй немтор, он тӧдӧй, кӧні сійӧ?

— Эг кывлӧй, ог тӧдӧй, — шуӧны лэбачьяс.

Мӧд войнас старик чукӧстіс ас дінас став зверъяссӧ да юалӧ налысь:

— Синмӧн аддзытӧм йылысь эн кывлӧй немтор, он тӧдӧй, кӧні сійӧ?

— Эг кывлӧй, ог тӧдӧй, — шуӧны зверъяс.

Коймӧд войнас старик чукӧртіс ас дінас став черияссӧ, лягушаяссӧ, дзодзувъяссӧ, став гут-гагсӧ, жук-жагсӧ да юалӧ налысь:

— Синмӧн аддзытӧм йылысь эн кывлӧй, он тӧдӧй кӧні сійӧ?

— Эг кывлӧй, ог тӧдӧй, — вочавидзисны ставныс.

Друг кыськӧ воис сэки кокпӧла пӧрысь лягуша да шуӧ стариклы:

— Ме тӧда, кытысь корсьны Синмӧн аддзытӧмӧс, сӧмын ме верма индыны сылысь оланінсӧ.

Вот босьтіс салдат сьӧрсьыс лягушаӧс да мӧдӧдчисны корсьны Синмӧн аддзытӧмӧс. Мунісны да мунісны и воисны, медбӧрын, ӧти керка дінӧ. Лягуша и шуӧ салдатлы:

— Пыр мун тайӧ керкаас да дзебсьы шкап саяс и пондан видзӧдны гусьӧн, мый пондас керсьыны керка пытшкӧсын.

Пырис салдат керка пытшкӧсӧ, дзебсис шкап саяс да виччысьӧ. Друг керкаӧ пырис чӧрт да зэв гораа шуис:

— Синмӧн аддзытӧм! Вай меным дас кык сулея вина да дас кык сулея сур!

Друг сэки пызан вылын лои дас кык сулея вина да дас кык сулея сур. Чӧрт юис да юис и сэтчӧ ляс-уси места вылас да унмовсис. Петіс сэк шкап сайысь салдат да шуӧ:

— Синмӧн аддзытӧм, вай меным мыйкӧ сёйыштны, юыштны да куритчыны!

И сійӧ здукас жӧ пызан вылын лоины сёянъяс, юанторъяс да куритчан кӧлуй. Закуситыштіс салдат да шуӧ:

— Он-ӧ лок, Синмӧн аддзытӧм, ме ордӧ служитны? Тырмас тэд чӧртлы служитны!

— Локта, — шуӧ, — мездан кӧ менӧ чӧртлы служитӧмысь?

Вот мӧдӧдчис салдат Синмӧн аддзытӧмкӧд чӧрт ордысь пышйыны. Пышйисны да пышйисны, а чӧрт коркӧ садьмис да пондіс на бӧрся вӧтчыны. Кыліс Синмӧн аддзытӧм чӧртлысь вӧтчӧмсӧ да шуӧ салдатлы:

— Шыбит, служивӧй, бӧрвылад ассьыд бедьтӧ, а то чӧртыд збыльысь миянӧс суӧдас!

Шыбитіс салдат ассьыс бедьсӧ и бӧрвылас быдмис сэтшӧм сук вӧр, мый сэті прӧйдитны оз позь. Пондісны пышйыны водзӧ. А чӧртыд сэккості чегъяліс пуяс, писькӧдіс аслыс туй да бара пондіс суӧдны салдатӧс. Синмӧн аддзытӧм и шуӧ:

— Шыбит, служивӧй, бӧрвылад ассьыд зудтӧ, а то чӧртыд суӧдас миянӧс! Шыбитіс салдат ассьыс зудсӧ и бӧрвылас быдмис зэв джуджыд из гӧра. Пондісны пышйыны водзӧ. А чӧртыд сэк кості йирис да жугліс гӧратӧ, аслыс туй писькӧдіс и бара мӧдіс суӧдны салдатӧс. Синмӧн аддзытӧм и шуӧ:

— Шыбит, служивӧй, бӧрвылад сир тыра чумантӧ, а то чӧртыд суӧдас миянӧс!

Шыбитіс салдат аслас сумкаысь сир тыра чумансӧ и бӧрвылас друг лои зэв паськыд сир ю. Воис чӧрт сир ю дінӧ, кӧсйыліс жӧ эськӧ вуджны, но некыдз вуджны эз вермы да бӧр косіс. Салдат бӧр воис аслас оланінӧ, видзӧдӧ: а сылысь керкасӧ ставсӧ жуглӧма — гӧтыр ни овмӧс абу кольӧма.

Пондіс юасьны салдат аслас суседъяслысь, кытчӧ вошис сылӧн гӧтырыс, коді жугліс сылысь керкасӧ.

Суседъяс висьталісны, мый сар жугліс сылысь керкасӧ, гӧтырсӧ сылысь нуӧдіс аслыс гӧтыр вылӧ, талун буретш свадьба заводитчӧ.

— Дырджык менам ветлыссьӧма, — шуӧ салдат, — срокысь дырджык гуляйтсьӧма. Лок жӧ, Синмӧн аддзытӧм, ветлам менам гӧтыр свадьба вылӧ!

Муніс салдат сар ордӧ, а сарлӧн слугаяс сійӧс матӧ оз сибӧдны дворец дінӧ: сарлӧн сідз тшӧктӧма — не лэдзны салдатӧс дворец пытшкӧ. Скӧрмис салдат да шуӧ:

— Синмӧн аддзытӧм, кучкы ӧти часӧвӧйлы ӧти пель бокас, а мӧдыслы — мӧдар пель бокас, но сӧмын мед оз ло кувтӧдзыс!

Кучкис Синмӧн аддзытӧм кыкнан часӧвӧйыслы ӧтчыдысьӧн — найӧ турун мешӧкъяс моз тутісны ӧтарӧ-мӧдарӧ. Пырис салдат сарскӧй дворец пытшкӧ, а сэні буретш свадьба заводитчӧма: гӧтрасьӧ сарыд служивӧй гӧтыр вылӧ. Аддзис сар салдатӧс да шуӧ сылы:

— Но, мый, служивӧй, вайӧдін Синмӧн аддзытӧмтӧ?

— Вайӧді.

— Кутшӧм служба сійӧ кужӧ вӧчны?

А салдат и шуӧ сылы:

— Менам Синмӧн аддзытӧмыд быдтор кужӧ вӧчны. Колӧкӧ петкӧдла, мыйяс кужӧ вӧчны?

— Петкӧдлы, — шуӧ сар.

— Эй, Синмӧн аддзытӧм! — шуӧ салдат, — кучкы ӧтчыдысь пель бокас сылы, коді пышйӧдіс менсьым гӧтырӧс!

Синмӧн аддзытӧм кучкис ӧтчыдысь пель бокас сарлы. Сар уси сэтчӧ места вылас да кулі.

Служивӧй бӧр босьтіс ассьыс гӧтырсӧ и пондісны овны воддза дорсьыс бурджыка.