ОШ ДА КУИМ ЧОЙ
Важӧн олісны-вылісны старик гозъя. Налӧн вӧлі куим ныв — куим невеста. Вот коркӧ мамыс кутіс пӧжасьны да град йӧрӧ ыстіс ыджыд нывсӧ капуста кор нетшкыны.
Петіс ныв град йӧрӧ да аддзис: град бӧрӧздаті шӧвк тупыль тупыльтчӧ. Ныв кӧсйис кватитны тупыльсӧ, а тупыльыд водзӧ и водзӧ, потшӧс костӧд чеччыштіс да туй вывті мӧдіс быгыльтчыны. Ныв котӧртіс да котӧртіс тупыль бӧрся и друг сылы ош паныдасис.
— Пуксьы, — шуӧ, — ме мышку вылӧ, он кӧ пуксьы, ме тэнӧ сёя.
Пуксис ныв ошлы мышку вылас, а ош нуис сійӧс вӧр керкаӧ аслыс гӧтыр вылӧ.
Ыстіс мамыс шӧркост нывсӧ капуста кор нетшкыны да ыджыд чойсӧ корсьны. Петіс шӧркост ныв град йӧрӧ и аддзӧ: град бӧрӧздаті шӧвк тупыль быгыльтчӧ. Сійӧ кӧсйис кватитны тупыльсӧ, а тупыль водзӧ и водзӧ, потшӧс костӧд чеччыштіс да туй вывті мӧдіс быгыльтчыны. Ныв котӧртіс да котӧртіс тупыль бӧрся и друг сылы ош паныдасис.
— Пуксьы, — шуӧ, — менам мышку вылӧ, он кӧ пуксьы, ме тэнӧ сёя.
Пуксис шӧркост ныв ошлы мышку вылас, а ош нуис сійӧс вӧр керкаӧ аслыс гӧтыр вылӧ.
Ыстіс мамыс медічӧт нывсӧ град йӧрӧ капуста кор нетшкыны да чойяссӧ корсьны. Петіс ичӧт нылыс град йӧрӧ и аддзӧ: град бӧрӧздаті шӧвк тупыль тупыльтчӧ. Ныв кӧсйис эськӧ кватитны сійӧс, но тупыль водзӧ и водзӧ, потшӧс костті чеччыштіс да туй вывті мӧдіс быгыльтчыны. Ныв котӧртіс да котӧртіс тупыль бӧрся и друг сылы ош паныдасис.
— Пуксьы, — шуӧ, — менам мышку вылӧ, он кӧ пуксьы, ме тэнӧ сёя.
Пуксис ичӧт ныв ошлы мышку вылас, а ош нуис сійӧс вӧр керкаӧ аслыс гӧтыр вылӧ.
Олісны, олісны да коркӧ чойяс и кутісны тшӧктыны ошлы приданнӧй сундукъяс вӧчны, приданнӧй да гӧснечьяс бать-мамлы мӧдӧдны. Вӧчис ош зэв ыджыд куим приданнӧй сундук, куимнан чойыслы морт ӧтикӧн. Чойяс сӧвтісны сундукӧ быдсикас кӧлуй да сэтчӧ ыджыд чойнысӧ пуксьӧдісны да шуӧны ошлы:
— Ну бать-мамлы приданнӧй да гӧснеч тыра сундук, но сӧмын туй вылын сундук не восьтыны. Ми керка вывсянь пондам видзӧдны тэ бӧрся.
Ош нӧбйыштіс сундуксӧ мышку вылас да мӧдіс котӧртӧдны старик гозъя ордӧ. А сундукыд вывті сьӧкыд.
— Мыйкӧ тай зэв сьӧкыд, — шуӧ ош, — час видзӧдла, мый сэтчӧ сэтшӧм сьӧкыдсӧ сӧвтӧмаӧсь.
Муртса на кӧсйис сундуксӧ пуктыны муӧ, кыдзи друг кыліс гӧлӧс:
Эн лысьт пуктыны,
Эн лысьт восьтыны,
Аддза ме,аддза,
Ылысь зэв аддза!
— Вот, — шуӧ, — кутшӧм ёсь синма менам гӧтырӧй. Эта ылнаысь и пыр на аддзӧ.
Вайис ош сундуксӧ старик гозъя оланінӧдз, крап чӧвтіс кильчӧ выланыс да горӧдіс:
— Ыджыд нывсяньыд приданнӧй да гӧснечьяс вайи!
Старик гозъя пыртісны сундуксӧ керкаӧ, восьтісны вевтсӧ, а сэні налӧн медыджыд нылыс пукалӧ. Зэв рад лои старикъяслы, мый ыджыд нылыс налӧн бӧр воис.
Воис ош гортас, а шӧркост чой сылы лолыштнысӧ оз сет:
— Пырысь-пыр жӧ ну менсьым приданнӧй сундукӧс!
Вӧчны нинӧм, пондіс ош лӧсьӧдчыны туйӧ, медым мӧд сундуксӧ старик гозъя ордӧ котӧртӧдны, а сэк кості шӧркост чойыс пуксис сундук пытшкас да пӧдласис.
Ош нӧбйыштіс мышку вылас сундуксӧ да пондіс котӧртӧдны сійӧс старик гозъя ордӧ. А сундукыс вывті сьӧкыд.
— Мыйкӧ тай зэв сьӧкыд, — шуӧ ош, — час жӧ видзӧдла, мый сэтчӧ сэтшӧм сьӧкыдсӧ сӧвтӧмаӧсь.
Муртса на кӧсйис сундуксӧ пуктыны муӧ, друг кыліс сундук пытшсянь гӧлӧс:
Эн лысьт пуктыны,
Эн лысьт восьтыны,
Аддза ме, аддза,
Ылысь зэв аддза!
— Вот, — шуӧ, — кутшӧм ёсь синма менам гӧтырӧй. Эта ылнаысь и — пыр на аддзӧ!
Вайис ош сундуксӧ старик гозъя оланінӧдз, крап чӧвтіс кильчӧ выланыс да горӧдіс:
— Шӧркост нывсяньыд приданнӧй да гӧснечьяс вайи!
Старик гозъя пыртісны сундуксӧ керкаӧ, восьтісны вевтсӧ, а сэні налӧн шӧркост нылыс пукалӧ. Зэв рад лои старикъяслы, мый мӧд нылыс налӧн бӧр воис.
Воис ош гортас, а ичӧт чой сылы лолыштнысӧ оз сет:
— Пырысь-пыр жӧ ну тшӧтш и менсьым приданнӧй сундукӧс!
Вӧчны нинӧм, пондіс ош лӧсьӧдчыны туйӧ, медым коймӧд сундуксӧ старик гозъя ордӧ котӧртӧдны. Ош лӧсьӧдчигкості нылыс катӧдіс керка вевт вылас куим гыр, пасьтӧдіс найӧс нывъяс паськӧмӧн да ошлы шуӧ:
— Ну менсьым приданнӧй сундукӧс да туй вылад эн восьты сійӧс, пытшкас эн видзӧдлы. Ми куимнан чойным керка вевт вывсянь пондам тэ бӧрся видзӧдны.
Сэсся ичӧт чой ачыс пырис сундук пытшкӧ да топыда вевттьысис.
Ош нӧбйыштіс мышку вылас сундуксӧ да пондіс котӧртӧдны сійӧс старик гозъя ордӧ. А сундукыс вывті сьӧкыд.
— Мыйкӧ тай збыльысь зэв сьӧкыд, — шуӧ ош, — час жӧ видзӧдла, мый сэтчӧ сэтшӧм сьӧкыдсӧ сӧвтӧмаӧсь.
Муртса на кӧсйис пуктыны сундуксӧ муӧ, кыдзи друг кыліс сундук пытшсянь гӧлӧс:
Эн лысьт пуктыны,
Эн лысьт восьтыны,
Аддза ме, аддза,
Ылысь зэв аддза!
— Вот, — шуӧ, — кутшӧм ёсь синма менам гӧтырӧй. Эта ылнаысь и — пыр на аддзӧ!
Вайис ош сундуксӧ старик гозъя оланінӧдз, крап чӧвтіс кильчӧ выланыс да горӧдіс:
— Ичӧт нывсяньыд приданнӧй да гӧснечьяс вайи!
Старик гозъя пыртісны сундуксӧ керкаӧ, восьтісны вевтсӧ, а сэні налӧн ичӧт нылыс пукалӧ. Зэв рад лоис старикъяслы, мый коймӧд нылыс налӧн воис гортӧ.
Воис ош гортас да аддзӧ, мый куимнан чойыс вӧччӧмаӧсь да пыр на сулалӧны керка вевт вылын. Ош горзӧ налы:
— Лэччӧй ӧдйӧджык керка вывсьыс да лӧсьӧдӧй меным сёйны!
А найӧ сэні вочакыв оз сетны и лэччыны оз думайтны. Чуксасис, чуксасис ош да скӧрмис бӧръявылыс: босьтіс кузь коколюка да пондіс гурйыны найӧс. А пасьтӧдӧм гыръясыд тай кыдз быгыльтчасны да швачкысясны ошлы юр вылас, сэсся сэтчӧ сійӧс и лямӧдасны.
А куим чой гортаныс воисны да и ӧні, гашкӧ, олӧны-вылӧны бать-мам орданыс.
