ВЕСЬТ КУЗЯ СТАРИК

Олісны-вылісны старик гозъя. Налӧн вӧлі кык ныв: ӧтиыс рӧднӧй, а мӧдыс тьӧтпом ныв. Старука эз радейт тьӧтпом нылӧс и быд ног зілис сыысь мынтӧдчыны.

— Катӧд ассьыд нывтӧ вӧрӧ, — шуӧ стариклы, — и эновт сэтчӧ!

Стариклы эськӧ жаль, но вӧчны нинӧм. Босьтіс сійӧ ассьыс нывсӧ, сыкӧд тшӧтш каньӧс, петукӧс да шырӧс, катӧдіс вӧр керкаӧ да и эновтіс.

Ныв коли вӧр керкаӧ, чышкысис, мыськасис. Сэсся пач ломтіс, пусис, пӧжасис, вердіс каньӧс, петукӧс да шырӧс и пондіс виччысьны батьсӧ:

— Батьӧ, батьӧ, лок, лок! Пӧсь нянь пӧжассис, сёян-юан пусис.

— Локта, нылӧ, локта! — шыасис сэк ӧдзӧс сайсянь гӧлӧс. — Ачым весьт кузя, тошкӧй корӧсь кодь, нопйӧй пывсян кодь!

Пырис керкаӧ весьт кузя старик да и шуӧ:

— Кытчӧ нӧ ме ассьым нопйӧс ректа?

— Гӧбӧчӧ ректы.

Вот пуксисны сёйны пызан сайӧ. Нылыд вердіс весьт кузя старикӧс, ещӧ вердыштіс каньӧс, петукӧс да шырӧс да и узьны водны мӧдісны лӧсьӧдчыны. Ныв водіс паччӧрӧ, а весьт кузя дядьӧ — пӧлатьӧ. Войнас котӧртіс шыр да шуӧ:

— Сьӧлышт аслад местаӧ да ӧдйӧджык вешйы мӧд местаӧ. А он кӧ вешйы, весьт кузя старикыд тэнӧ сёяс.

Ныв сьӧлыштіс аслас местаӧ да ачыс дзебсис пач костӧ. А весьт кузя старик чеччис войнас да пондіс корсьны нылӧс. Корсис, корсис да кань вылӧ веськалі. Каньыд тай кыдз тшапнитіс сылысь кисӧ. Весьт кузя старик чепӧсъяс каньысь да друг петук вылӧ зурасяс. Петукыд тай кыдз горӧдас:

— Ки-ки-рек-ку!

Старикыд повзис да и пышйис. Мӧд лун асывнас нылыд видзӧдлас гӧбӧчас, а сэні — тырыс деньга. Сэсся локтіс нывлӧн батьыс, сӧвтіс доддьӧ деньгасӧ да нывсӧ лэччӧдіс гортас.

Старука завидьысла муртса оз пот. Сійӧ тэрмӧдлӧ старикӧс:

— Мун, пырысь-пыр жӧ катӧд вӧр керкаӧ менсьым нылӧс. Менам ныв сэсь кык додь деньга ваяс.

Катӧдіс старик мӧд нывсӧ вӧр керкаӧ. Сыкӧд тшӧтш бара жӧ катӧдіс петукӧс, каньӧс да шырӧс. Нылыд некодӧс эз понды виччысьны, пусис, пӧжасис, ачыс сёйис, а петуклы, каньлы да шырлы крӧшкитор эз сетлы.

Войнас бара локтіс весьт кузя старик. Ныв сійӧс эз верд, эз юктав — пызан сайӧ эз пуксьӧдлы. Водісны узьны: нылыд — паччӧрӧ, а весьт кузя старик — пӧлатьӧ. Войнас весьт кузя дядьӧ локтіс ныв дінӧ, сёйис сійӧс ставнас, а лы торъяссӧ-тэчис чукӧрӧн ӧшинь вылас да муніс.

Мӧд лун асывнас локтіс батьыс нылысла, сӧвтіс сылысь лы чукӧрсӧ да мӧдӧдчис гортӧ. Стариклысь локтӧмсӧ ылысянь на аддзис понйыс налӧн да пондіс тявксыны:

— Тяв, тяв! Старик старукалы додь тыр лы вайӧ!

Старука скӧрмис пон вылӧ да пондіс сійӧс ойкӧдны беддьӧн:

— Йӧй пон, тэ, йӧй пон! Тэд ӧд колӧ шуавны: старукалӧн дона нылыс локтӧ, додь тыр приданнӧй вайӧ!

Видзӧдліс старука доддьӧ и збыльысь аддзис сэсь аслас дона нылыслысь сӧмын лы чукӧрсӧ.