БАРИНЛӦН ПОН

Олісны-вылісны мужик да барин. Коркӧ воис кӧдзан кад, и мужик мӧдӧдчис барин ордӧ кӧйдыс водзӧсавны. Мыйӧн матыстчис мужик барин керка дінӧ, уськӧдчисны сы вылӧ баринлӧн понъясыс да пондісны сійӧс пурны. Мый керны? Бергӧдчыны оз позь и водзӧ мунны туй абу. А понъяс сідзи и чашйӧны сійӧс. Кватитіс сэк мужик туй вылысь зорпом да кучкис ӧти понлы. А грек вылад, понйыд и ӧкӧлейтіс.

Аддзис барин, мый мужик сылысь медбур понсӧ виис, тшӧктіс кутны мужикӧс да судӧ сійӧс кыскис. Суддяяс юалӧны баринлысь, кыдзи и мый судитны мужикӧс пон виӧмысь.

— А вот, — шуӧ, — кыдзи судитӧй. Медым мужик кутас меным пон пыдди служитны, войясын амбаръяс дінын увтны да вӧръясӧс повзьӧдлыны, и морт гӧлӧс медым сысянь некор сэсся оз кывлы.

Сідзи и судитісны мужикӧс: индісны сійӧс пон пыдди служитны баринлы.

Первой войсӧ мужик войбыд зэв ёна увтіс барин ӧшинь улын, баринлы зэв кажитчис тайӧ бура увтӧмыс. Асывнас чеччис барин да тшӧктӧ слугаясыслы:

— Колӧ бурджыка вердны выль понйӧс. Ок, кутшӧм бура увтіс сійӧ тавой.

Мӧд войнас мужик ещӧ ёна увтіс, войбыд баринлы узьны эз сетлы. Но баринлы вӧлі нимкодь, мый сылы сэтшӧм кӧзяйскӧй бур пон сюри.

Коймӧд войнас мужикыд ачыс сёрнитчис вӧръяскӧд, мед найӧ непременнӧ локтасны баринлысь амбаръяс гусявны. Ме кӧть пӧ и мӧда ёна увтны, менсьым увтӧмӧс ті пыдди эн пуктӧ, а нуӧ став эмбурсӧ амбарсьыс. Войнас волісны вӧръяс да збыльысь амбаръяссьыс став эмбурсӧ нуисны. А тайӧ войнас мужикыд ещӧ на ёна увтіс, войбыд лявксис барин ӧшинь улын.

— Колӧ бурджыка вердны выль понйӧс. Тайӧ войнас сійӧ сэтшӧм бура увтіс, — бара тшӧктӧ слугаяслы барин.

Асывнас петісны слугаяс баринлысь эмбур видзӧдлыны, а амбаръясыд сылӧн тыртӧмӧсь. Скӧрмис барин мужик вылӧ да бара судӧ кыскис. Суд вылын баринлысь юалӧны: «Увтіс эз сійӧ войнас тэнад выль понйыд?»

— Увтіс, — шуӧ, — вывті ёна увтіс.

— Сідзкӧ, тэ ачыд мыжа, — шуӧны суддяяс, — сылы индӧма увтны, а не висьтавны.

— Ті кӧ сійӧс он судитӧй, — шуӧ барин, — ме сійӧс ачым ас судӧн судита.

Доддяліс барин вӧвсӧ, пуксьӧдіс сэтчӧ мужикӧс да мӧдіс сійӧс нуӧдны карӧ тюрьмаӧ пуксьӧдны. Карӧдз вӧлі вӧлӧк колӧ вуджны, и найӧ воймисны туйын. Мужик видзӧдліс туй бокӧ да шуӧ баринлы:

— Видзӧд жӧ, барин, татчӧ, миян дінӧ, со ош локтӧ. Мый кутам керны?

— Увт, — шуӧ барин, — увт!

— Мем, — шуӧ мужик, — увтны оз позь, а то бара менӧ судӧ кыскан. Ӧні тэ ачыд увт!

И пондіс барин увтны. Увтіс да увтіс, войбыд пыр увтіс — ошкӧс повзьӧдліс. А асывнас, югдӧм бӧрын нин, мужик сылы и шуӧ:

— Некутшӧм ош эз вӧв. Ме тэнӧ прӧстӧ пӧръялі ошнад. Менӧ кӧ тэ збыльысь кутан тюрьмаӧ пуксьӧдны, ме ӧні став йӧзыслы висьтала, мый миян барин тавой войбыд пон моз увтіс.

— Тюрьмаӧ ог пуксьӧд, — шуӧ барин, — сӧмын чӧв ов и некодлы эн висьтав, мый ме тавой пон моз увті.