КОДІ МЕДЙӦЙ

Олісны-вылісны гозъя. Налӧн вӧлі мӧс, вӧв, ыж да меж. Ӧтчыд мужикыс муніс ылыс нажӧтка вылӧ, а бабаыс горт овны кольччис. Коркӧ-некоркӧ казялісны куим жулик, мый бабалӧн мужикыс нажӧтка вылӧ мунӧма да думайтісны бабатӧ пӧръявны.

Первой локтіс ӧти жулик.

— Мужикыдкӧд, — шуӧ, — ӧтлаын уджалім. Зэв уна эмбур вайӧ да локнысӧ оз вермы, менӧ вӧвла ыстіс.

Сетіс баба жуликлы ассьыс вӧвсӧ, а жулик нимкодясьӧ, мый йӧй бабаӧс ылӧдны удайтчис. Недыр мысти баба дінӧ локтіс мӧд жулик, первой жуликлӧн ёртыс.

— Мужикыд, — шуӧ, — уна эмбур вайӧ. Ӧти вӧвнад кыскынысӧ оз вермы да отсӧг вылӧ мӧстӧ корис.

Сетіс бабаыд жуликлы ассьыс мӧссӧ, а жулик нимкодясьӧ да син саяс сералӧ сы вылын.

Недыр мысти баба дінӧ локтіс коймӧд жулик.

— Некыдз, — шуӧ, — мужикыд локнысӧ оз вермы. Эмбур кыскыны корис ыжтӧ да межтӧ.

Сетіс бабаыд жуликлы ыжсӧ да межсӧ, а жуликлы сійӧ и вӧлі колӧ.

Коркӧ-некоркӧ воис бабалӧн мужикыс нажӧтка вылысь.

— Кӧні нӧ, — шуӧ, — гӧтыр, вӧлыд, мӧскыд, ыжыд да межыд?

Гӧтырыс ставсӧ висьталіс, кыдзи мый вӧлі. Гӧгӧрвоис мужик, мый гӧтырсӧ сылысь сы ветлігкоста йӧйтӧдлӧмаӧсь. Скӧраліс, скӧраліс, но вӧчны немтор.

— Но, — шуӧ, — тэысь йӧйыс некод жӧ кӧнкӧ абу свет вылас. Кодкӧ кӧ тэ дорысь йӧй сюрӧ — прӧстита, а оз кӧ — гортысь вӧтла.

Нопъясис мужикыд да мӧдӧдчис свет вылысь йӧйясӧс корсьны.

Мунӧ мужик да аддзӧ озыр баринлысь керка.

— Час, — шуӧ, — татчӧ кежала, гашкӧ, тані эмӧсь йӧйясыд.

Пырис мужик барин ӧградаӧ, а сэні баринлӧн порсьыс пияныскӧд йирсьӧ.

Мужик уськӧдчис пидзӧс вылас да пондіс порсь водзын копрасьны да сійӧс быдног ыдждӧдлыны. Барыня аддзис ӧшинь пырыс да ыстіс служанкасӧ.

— Мун, — шуӧ, — петав да юав, мый сэні йӧй мужикыс порсь водзас копрасьӧ?

Петіс служанка да юалӧ мужиклысь, мыйла сійӧ порсь водзын копрасьӧ.

— Висьтав мун барыняыдлы, — шуӧ мужик, — тайӧ порсьыс менам бабалӧн чой. Аски менам пиӧй гӧтрасьӧ да пир вылӧ корӧ. Оз-ӧ барыняыд сійӧс лэдзлы порсьпияныскӧд?

Барыня пондіс шензьыны:

— Но и бӧлбан жӧ тайӧ дядьӧыс! Порсьӧс пир вылӧ корӧ. Сета, медым йӧзыс ёнджыка сераласны.

Тшӧктіс барыня пара вӧв доддявны да ас платтьӧнас порсьӧс пасьтӧдны. Пуксьӧдісны порсьӧс вӧв доддьӧ да сетісны мужиклы. Мужикыд сэні эз понды дыр виччысьны: кучкис вӧвъяслы да гӧнитіс гортланьыс.

Вот воис барин гортас, а барыняыс сылӧн зэв ёна сералӧ.

— Мый нӧ тэ сералан? — юалӧ сылысь верӧсыс.

— Кыдзи нӧ он серав. Воліс кутшӧмкӧ йӧй мужик да миян порсьлы кок вылас юрбитӧ да сы водзын копрасьӧ. Шуӧ, тайӧ пӧ менам гӧтырлӧн чой, пир вылӧ корны сійӧс локті.

— А тэ сетін сылы порсьтӧ?

— Медбур параа вӧвтӧ доддялі да мӧдӧді порсьӧс пир вылӧ. Мед, мися, кӧть йӧзыс йӧй мужик вылын ёнджыка сераласны.

— А кытысь мужикыс вӧлі?

— Ме сійӧс ог тӧд, эг юав.

— Ок тэ, йӧй! Мужикӧс йӧйӧ пуктан, а йӧйыс ӧд тэ ачыд.

Скӧрмис бариныд, мый кутшӧмкӧ мужик сылысь барынясӧ пӧръялӧма, сӧліс вӧв вылӧ да пондіс вӧтчыны.

Кыліс мужик, мый барин сы бӧрся вӧтчӧ. Сійӧ кежӧдіс вӧвъяссӧ туй бокӧ. Ачыс пуксис туй бокас, кымыньтіс шапкасӧ муӧ да пондіс шапка дінын зунясьны.

Воис бариныд мужик дінӧ да юалӧ:

— Эн-ӧ аддзыв вӧла мужикӧс? Доддяс сылӧн седок пыдди порсь да порсьпиян.

— Кыдз, — шуӧ, — эг аддзыв! Аддзылі. Важӧнкодь нин таті гӧнитіс.

— А кыдзи меным сійӧс суӧдны? — юалӧ барин.

— Суӧдны сійӧс абу сьӧкыд, — шуӧ мужик. — Сӧмын тані туйыс уна вожа да верман ылавны.

Барин повзис ылалӧмысь да шуӧ мужиклы:

— Вай вӧтчы сы бӧрся да кут сійӧ дядьӧсӧ.

— Ме мунны ог вермы, — шуӧ мужикыд. — Ӧти-кӧ, ме пода, а мӧд-кӧ, со шапка улын менам пипиристи-сӧкӧл пукалӧ. Лэбзяс кӧ, сё загреки, кӧзяин менӧ виас.

— Ме тэныд ассьым вӧлӧс сета, а пипиристи-сӧкӧлӧс видзны ачым кольчча, — шуӧ барин.

— Ог, ог вермы йӧз киӧ кольны пипиристи-сӧкӧлӧс, — шуӧ мужик. — Ӧд сы вылӧ витсё шайт мынтӧма. Лэдзан кӧ, мый тэнсьыд босьтан?

— Он кӧ веритчы, вот тэныд витсё шайт пипиристи-сӧкӧл вылад. Кор бӧр локтан, ме сэки бӧр сета тэныд сӧкӧлтӧ.

Босьтіс мужикыд витсё шайт, сӧліс барин вӧв вылӧ да гӧнитіс гортланьыс. А барин пуксис мужик шапка дінӧ да сӧкӧл-птицаӧс видзӧ. Виччысис-виччысис, шондіыс увтасмыны нин пондіс, а мужик век на абу.

— Эз-ӧ нин пӧръяв менӧ мужикыд? — думыштіс барин, — час видзӧдла сӧкӧл-птицасӧ, пӧръяліс кӧ, сӧкӧл-птицаыс кӧть меным кольӧ.

Доровтыштіс шапкасӧ да шапка улӧ видзӧдӧ, ачыс полӧ, мед эськӧ сӧкӧл-птицаыд оз лэбзьы. Восьтіс шапкасӧ, а сэні сӧкӧл-птица пыдди вӧв куйӧд.

Скӧрмис жӧ эськӧ барин, да вӧчны нинӧм. Сэсся сьӧлыштіс да муніс гортас, аслас барыня дінас.

А мужик гортас воис тройка вӧлӧн, снитки выль доддьӧн, содтӧд сы дінӧ энь порсь, дас кык порсьпи да витсё шайт деньга.

— Но, — шуӧ, — баба, ӧні ов да нимкодясь: свет вылас тэысь кындзи йӧйяс вӧлӧмаӧсь на.