БАРИН ДА КУЗНЕЧ

Мунӧ ӧти барин, а сэні кузнеч дорччӧ.

— Здорово, кузнеч, мый доран?

— Кӧрт тув дора.

— Донӧн-ӧ кӧрт тув?

— Сё шайтӧн кӧрт тув.

Баринлы зэв дивӧ лои: сё шайтӧн кӧ быд кӧрт тув, кымын сё шайт нажӧвитас луннас кузнечыд!

— Час, — шуӧ барин, — муна да кузнеча восьта. Тайӧ тай му дорсьыд ыджыдджык нажӧтка вайӧ.

Лӧсьӧдіс барин кузнеча. Ачыс кузнеч пыдди, а слугасӧ пушкан дорӧ сувтӧдіс.

Мунӧ вӧлі сійӧ кузнеча дорті дядьӧ да кежис кузнечаӧ:

— Дор, — шуӧ, — меным телега чӧрс.

— Дора.

— Уна-ӧ босьтан?

— Сё шайт.

Слуга пушкан дінын сулалӧ, а барин телега чӧрс дорӧ. Дорис, дорис, некутшӧм тӧлк эз босьт: кал ни закал, став кӧртыс сотчис.

— Оз, — шуӧ, — тась телега чӧрсыд пет, вай лучшӧ телега шина дорам.

— Шина кӧ и шина, — шуӧ мужик.

Дорис да дорис барин телега шина да бара немтор эз артмы: став кӧртыс сотчис.

— Оз, — шуӧ, — телега шинаыд тась пет, вай лучшӧ телега трубича дорам.

— Трубича кӧ и трубича, — шуӧ мужик.

Дорис да дорис барин телега трубича, бара немтор эз артмы: кал ни закал, став кӧртыс сотчис.

— Телега трубичаыс, — шуӧ, — татысь оз пет, вай лучшӧ подков вӧчам.

— Подков кӧ и подков, — шуӧ мужик.

Дорис, дорис барин подков да бара немтор эз артмы. Сэсся гусьӧн шӧпнитіс слугаыслы:

— Мун, — шуӧ, — Ӧдйӧджык петав да гусяв мужикыслысь телега чӧрссьыс чокасӧ, пырт да ва воръяс татчӧ чӧвт.

— Но, — шуӧ, — мужик, подковыд тась оз пет, вай лучшӧ телега чока дорам.

Дорис да дорис, дорис да дорис, кӧртыс чунь пом кодь нин сӧмын коли.

— Час, — шуӧ, — ещӧ ӧтчыд донӧдла, сэсся и гӧтов лоӧ телега чокаыд.

Зэв ёна донӧдіс да чӧвтіс сотчӧм кӧрт торсӧ ва тыра ворйӧ, сэсся клещинас ворйысь корсис мужиклысь гусялӧм покасӧ да сетіс мужиклы.

— Вот, — шуӧ, — тэныд телега чока. Вай сэсся меным за труды сё чӧлкӧвӧй.

— Ладнӧ, — шуӧ мужик, — час петала да вая: сьӧмӧй телегаӧ кольӧма.

Петіс мужик телега дорӧ, а сэк кості барин шуӧ аслас слугаыслы:

— Кор мужик ваяс сьӧмсӧ, тэ пондан шуавны: «Ещӧ содтышт!» И кытчӧдз оз мун, пыр кор содтӧд.

Мужик петаліс телега дорӧ, босьтіс сэтысь вӧлӧс кучкалан орс да кыдз тай кутіс баринӧс жаритны мышку кузяыс.

А баринлӧн слугаыс сулалӧ сэні да пыр ӧтитор шуалӧ: «Ещӧ содтышт, ещӧ содтышт!»

Тадзи мужик ки мудзтӧдзыс лупитіс баринӧс да муніс гортас.

А барин скӧралӧ слугаыс вылӧ:

— Ак, — шуӧ, — тэ, ӧмӧтюг, мездӧм пыдди горзан: «Ещӧ содтышт».

Нӧйтіс барин ассьыс слугасӧ и кузнечасӧ эновтіс.

Та бӧрын барин сэсся некор нин эз вежав кузнеч удж вылӧ.