МУЖИК ДА КУИМ ПОП

Важӧн олісны-вылісны гозъя. Налӧн и няньыс быри. Бабаыс мӧдіс шуны мужикыслы:

— Мун ветлы да капкан пукты, оз-ӧ шед кутшӧмкӧ звер.

Кайис дядьӧ вӧрӧ, пуктіс капкан, да сьӧд руч шедіс.

Мӧдӧдчис дядьӧ руч куӧн базар вылӧ, шойччигмоз пырис кабакӧ да шуӧ кабатчиклы:

— Он-ӧ ньӧб руч ку менсьым?

Кабатчик шуӧ:

— Ньӧба куим четверть винаысь.

Сетіс мужик кабатчиклы ассьыс руч кусӧ куим четверть винаысь.

Юис ӧти четвертьсӧ, дуб ни дэб эз мунлы, юис мӧдсӧ, неуна гажмыштіс, а коймӧдсӧ юис да поводнӧя коддзис.

Мужиклы паныдӧн пызан сайын вӧлі пукалӧны куим поп и дивуйтчӧны: кысь мужиклы та мында деньгаыс. Найӧ пыр видзӧдісны мужик юӧм вылӧ. Кор юсис мужикыдлӧн коймӧд четвертьыс, чеччис сійӧ пызан сайысь, шапкасӧ лэптыштліс да кабатчиклань юрнас довкнитіс:

— Кӧзяин, рӧщӧтын?

— Рӧщӧтын, рӧщӧтын, — шуӧ сылы кабатчик.

Попъяслы зэв дивӧ, мый мужикыд куим четверть винаысь шапкасӧ сӧмын лэптыштліс и грӧш эз мынты.

Вӧтчисны попъяс мужик бӧрся да юалӧны сылысь:

— Кыдзи нӧ тэ сьӧм мынтытӧгыс винасӧ юин?

А мужик налы шуӧ:

— Ме кӧть мыйтӧм ог ю, некор ог мынтысьлы. Шапкаӧс кӧ лэптыштла, менсьым некод некутшӧм дон оз босьт.

— Сідзкӧ, вай вузав миянлы ассьыд шапкатӧ.

— Вузала, — шуӧ мужик, — сетанныд кӧ сё шайтӧн мортысь.

Босьтіс мужик попъяслысь сё шайтӧн мортысь да локтіс гортас, а попъясыд зэв радпырысь мунісны гортаныс.

Попъясыс ас костаныс вӧліны рӧдняяс — свӧякъяс. Шапкасӧ первой босьтіс ыджыд свӧяк да шуӧ:

— Часлы первой ме ветла карӧ да гуляйтышта тайӧ шапканас.

Муніс сійӧ карӧ, пырис медся дона трактирас, чукӧртіс гӧститӧдны став тӧдсаяссӧ да шуӧ:

— Мыйтӧм колӧ, сы мында и юӧ, ме ставнытӧ юктала ас щӧт вылӧ.

Юисны да сёйисны гӧсьтъяс. Сэсся поп чеччис пызан сайысь, шапкасӧ лэптыштліс да юрнас гогнитіс кабатчиклы:

— Кӧзяин, тэкӧд ми рӧщӧтын?..

— Кабатчик кватитіс попӧс пӧлаӧдыс да шуӧ:

— Кыдз рӧщӧтын?! Сьӧмтӧ эн на мынты да.

Поп ас кежас мӧвпыштіс: «Гашкӧ, шапкасӧ неладнӧ шапкаавсис». Шапкасӧ сэсся мӧдарӧ бергӧдіс, бара лэптыштліс да кабатчиклань юрнас гогнитіс:

— Ӧні ӧд рӧщӧтын нин?

— Кыдзи нӧ рӧщӧтын? — скӧрмис сы вылӧ трактирщик.

Вӧчны нинӧм: поплы лои мынтыны кыксё шайт. Сійӧ пиньсӧ йиригтыр муніс гортас да свӧякыслы нинӧм эз висьтав.

Сэсся шапкасӧ босьтіс мӧд попыс, сідз жӧ муніс карӧ. Пырис бара жӧ медся дона трактирас да юис аслас тӧдсаясыскӧд. Юсьӧм бӧрын шапкасӧ лэптыштліс да юрнас гогнитліс трактирщиклы:

— Кӧзяин, тэкӧд ми рӧщӧтын?

— Кыдзи рӧщӧтын?!

И бара лоис мынтысьны. Локтіс поп гортас зэв скӧр и коймӧд свӧякыслы немтор эз висьтав.

Босьтіс шапкасӧ коймӧд поп. Муніс сійӧ карӧ, пырис медыджыд магазинас да зэв уна тӧвар ньӧбаліс. Ньӧбасьӧм бӧрын поп шапкасӧ лэптыштліс, юрнас гогнитыштіс купечлы да петігмозыс шуис:

— Кӧзяин, ми тэкӧд рӧщӧтын?

— Кыдзи рӧщӧтын?! — кватитіс купеч сійӧс пӧлаӧдыс да приказчикъяссӧ чукӧстіс. — Пырысь-пыр жӧ мынтысь.

Вӧчны немтор, быть лои мынтысьны. Сійӧ пиньсӧ йиригтыр муніс гортас да шуӧ свӧякъясыслы:

— Менӧ дядьӧыд тайӧ шапканад кыксё шайт дон рӧскодӧ воштіс.

Мӧд поп шуӧ:

— И менӧ кыксё шайт дон!

А коймӧд поп шуӧ:

— И менӧ кыксё шайт дон!

Шог йывсьыс найӧ мунісны кабакӧ, юисны да мӧдісны сёрнитны, кыдзи эськӧ пӧръясьӧмысь мужикӧс вины.

Сэні вӧлі пукалӧ служивӧй морт. Кыліс сійӧ попъяслысь сёрнисӧ да котӧртіс мужик ордӧ:

— Тэнӧ куим поп вины локтӧны, — шуӧ сійӧ мужиклы, — вод ӧдйӧджык пызан вылад, вевттьысь скатертьӧн да лэччысь кулӧм улӧ. Кор ме мӧлӧтӧн тэд плешкад котшнитышта, сэк чеччы. Сэсся ачыд аддзан, мый лоӧ.

Мужик сідзи и вӧчис: водіс поконикӧ, бабаыс сы дінын пондіс лыддьӧдлӧмӧн бӧрдны. А салдатыд петіс да дзебсис посводзас.

Пырисны куим поп мужик ордӧ да уськӧдчисны сы вылӧ.

Сэк посводзысь пырис салдат да шуӧ:

— Кулӧм мортӧс мӧд пӧв оз вилывлыны, верма, колӧкӧ, сійӧс ловзьӧдлыны.

Салдат корис поконик гӧтырлысь мӧлӧт да надзӧникӧн тотшнитыштіс мужиклы плешкас. Мужик звирк чеччыштіс пызан вылысь да шуӧ:

— Уп, зэв дыр узьсьӧма! Пасибӧ, служивӧй, тэныд ловзьӧдӧмыд вылӧ.

А попъяс сэн сулалӧны да шензьӧны:

— Вай жӧ вузав миянлы тайӧ мӧлӧттӧ.

— Кыдз нӧ вузала, — шуӧ мужик, — тайӧ мӧлӧтыс менӧ вердӧ и юкталӧ.

— Кыксё чӧлкӧвӧй сетам, — шуӧны попъяс, — вай регыдджык вузав.

Босьтіс дядьӧ попъяслысь кыксё чӧлкӧвӧй и салдатӧс зэв бура аттьӧаліс: кӧсйысис сійӧс во чӧж вердны-юктавны да табакӧн куритӧдны. А попъяс зэв нимкодьпырысь мунісны гортаныс.

Коркӧ кывсис, мый ӧти карын кувсьӧма зэв ыджыд генерал да коді пӧ вермас генералӧс бӧр ловзьӧдны, сылы лыдтӧм-тшӧттӧм деньга лоӧ сетӧма царскӧй казнаысь.

Мунісны попъяс сійӧ карас, пырисны озыр генерал керкаӧ да шуӧны:

— Кӧн нӧ поконикыс, ми сійӧс пырысь-пыр ловзьӧдам!

Пырисны найӧ поконик куйланінӧ да мӧлӧтӧн генераллы плешкас котшнитыштісны. Генерал эз чеччы. Кучкисны мӧдысь — оз чеччы. Ёнджыка кучкисны, бара эз чеччы.

Гӧгӧрвоисны попъяс, мый мужикыд бара найӧс пӧръяліс, и зэв ӧдйӧ пышйисны сійӧ карсьыс.

Воисны гортаныс и бара мужикӧс вины кӧсйӧны. Мужик ордӧ мунтӧдз кабакӧ пырисны вина юыштны да ас кежаныс сёрнитӧны:

— Ӧні мунам да пырысь-пыр жӧ виам.

А салдат, мужиклӧн другыс, вӧлі кабакын жӧ пукалӧ. Сійӧ кыліс попъяслысь сёрнисӧ да котӧртіс мужик ордӧ:

— Тэнӧ бара нин вины локтӧны попъясыд. Томнась керка пытшкад, а ме ӧдзӧстӧ понда караулитны.

Мужик томнасис, а салдат видзӧ сылысь ӧдзӧссӧ, оз лэдз попъясӧс мужик ордӧ пырны.

— Часлы, — шуӧ ӧти поп, — ме ӧшинь пырыс пырала да сійӧс виа.

Жугӧдіс поп мужиклысь ӧшиньсӧ да мӧдіс кавшасьны керка пытшкӧсӧ ӧшинь пырыс. А мужик черӧн сапнитіс поплы юрас.

Кык поп сулалісны, сулалісны туй вылын да дӧзмисны виччысьӧмсьыс.

— Ӧтнас тай свӧякыд немтор вӧчны эз вермы. Часлы ме пырала отсӧг вылӧ, — шуӧ мӧд попыс.

Вот и пондіс сійӧ кавшасьны ӧшинь пыр мужик ордӧ, а мужикыд бара черӧн юрас сапнитіс.

Виччысис, виччысис туй вылын коймӧд поп да шуӧ:

— Свӧякъяс менам, дерт, юсисны, ӧнӧдз мужикӧс вины оз жӧ тырмы. Часлы ме тшӧтш пырала.

Вот коймӧд поп пондіс кавшасьны ӧшинь пыр мужик керкаӧ, а мужик бара черӧн сӧтыштіс сылы юрас.

Пуксьӧдіс мужик ӧти поплысь шойсӧ скамья вылӧ, а мукӧдъяссӧ дзебис, сэсся чукӧстіс салдатӧс.

— Вай, служивӧй, мезды менӧ тайӧ чӧртсьыс. Быдсӧн кучкаліс менӧ.

Салдат кыдз кучкас поплы пель бокас — поп грыммуніс джоджӧ.

Мужик сылӧ и шуӧ:

— Вывті ёна служивӧй кучкин. Видзӧдлы, сылы кувтӧдзыс лои. Мед ог мыжмӧй, шыбит мун шойсӧ юкмӧсӧ.

Салдатыд вӧлі код. Сійӧ кватитіс поплысь шойсӧ, босьтіс пельпом вылас, котӧртіс да брунгис юкмӧсӧ.

Сэк мужикыд скамья вылӧ пуксьӧдіс мӧд попыслысь шойсӧ да ваӧн киськаліс. Салдат аддзис сійӧс да шуӧ мужиклы:

— Ме тай нӧ тайӧ кузь юрсиа чӧртсӧ ӧні на юкмӧсӧ шыбитлі, а тайӧ бара нин тані.

Сэсся кватитіс сійӧ мӧд поплысь шойсӧ да ю вылӧ котӧртіс. Кайис салдат мужик ордӧ, а мужикыд сэк коста коймӧд поплысь шойсӧ пуксьӧдіс скамья вылӧ. Салдат код юрнас эз гӧгӧрво да дивуйтчӧ:

— Тайӧ кузь юрсиаыс тай бара нин тані! Вай мем четверть вина. Ме тайӧс выль ипӧв лэччӧда ю вылӧ да асывводзӧдз сэн пукала, медым коймӧдысь оз кай.

Шыбитіс салдат коймӧд поплысь шойсӧ юкмӧсӧ да асывводзӧдз юкмӧс дорын пукаліс. Югдандорыс вичкодор туйті сійӧ мӧдіс сиктӧ кайны. Сиктын вӧлі асъя звӧнитӧны. Локтӧ салдат да ас кежас мӧвпалӧ:

— Ӧні кузь юрсиаыд васьыд оз пет...

А сэк буретш сійӧ сиктса попыс вӧлі мунӧ вичкоӧ асъя сьывны. Салдат аддзис поптӧ да думайтіс, мый бара нин сійӧ юкмӧсысь петӧма.

Сэсся кватитіс попӧс коскӧдыс, ю вылӧ котӧртӧдіс да юкмӧсӧ увлань юрӧн и сійӧс тшӧтш сюйис.