КЫДЗИ ПОП ЧАНЬ ПӦЖИС

Ӧтчыд поп ыстіс казакӧс ягӧ пес керавны. Казак гортӧ локтігас босьтіс туй боксьыс сёйтӧм тшак да сьӧрсьыс лэччӧдіс.

— Мый нӧ татшӧмсӧ, казак, вайин? — юалӧ сылысь поп.

— Тайӧ, — шуӧ, — батюшко, сэтшӧм кольк, кодӧс пӧжан кӧ, чань петас.

— Сідзкӧ велӧд менӧ, кыдзи колӧ сійӧс пӧжнысӧ? — шуӧ поп.

— Мый нӧ сэн кужтӧмыс. Пӧжсьысь курӧг моз лажгӧдчи, сӧмын эн курӧг моз клуткы, а вӧв моз гӧрдлы да нёль вежон чӧж пукав. Вот тэнад и чань пӧжсяс.

Пуксис поп чань пӧжны, пукалӧ да вӧв моз гӧрдлӧ. Ӧти вежон пукаліс, мӧд вежон пукаліс, коймӧд вежон пукалӧ.

— Но мый, батюшко, пӧжсьӧ-ӧ? — юалӧ сылысь казак.

— Пӧжсьӧ, дерт, кыдзи оз пӧжсьы.

Нёльӧд вежон тыригас казак бара вӧрӧ кайліс. Сэсся кутіс ловъя кӧчӧс да пӧла улас гортас вайис.

— Но, — шуӧ, — батюшко, пӧжсян строкыд тырис нин. Мыйкӧ артмыны кӧ, колӧ нин артмыны.

Сэсся ӧдзӧссӧ восьтыштіс да шуӧ:

— Ӧні, батюшко, куим пӧв бергӧдчы.

Поп куим пӧв бергӧдчис да тшакыд швач поті.

Сэки казак лэдзис ас пӧла увсьыс кӧчӧс.

Кӧч джодж кузя тринь-бринь, сэсся восьса ӧдзӧс пыр ывлаӧ да вӧрӧ гӧнитіс.

— Ак, прамӧй чань-ӧд и пӧжсьӧма, — дивуйтчӧ поп, — аддзылін, бӧр кокъясыс водз кокъяс сертиыс мый кузяӧсь? А бур и вӧв тась лои эськӧ, эз кӧ пышйы!