ОЗ КЫСКЫ ГОРТАД

Оз кыскы гортад! Бипур важӧн кусі,
Бӧр туйӧ нопйыд рытсяньыс нин дась.
А тэ уль вӧрлысь апалан на русӧ,
А тэ он тэрмась вӧрзьӧдчыны тась.

Со кӧні шойччан эбӧснад и ловнад,
Со кӧні вежӧр сӧстӧммӧ и вир.
Тэн колӧ тані, тані эськӧ овны,
Да со тай корӧ гудыр ыджыд мир.

Оз кыскы гортад! Жальӧн ставыс кольӧ:
И чӧс туйяс, и тшака-туся яг,
И кольӧн-лыскӧн гыбалысь сӧдз ёльыс,
Быд турун сі, быд ловъя лов, быд гаг.

Кӧть майтӧгӧн нин талун мыськин чужӧм,
Кӧть лаз пыддиыд кышӧдыд нин мӧд,
Тэн кодкӧ шӧпкӧ: тан ӧд, вӧрас, чужин,
Тэ татчӧ лок, эн гудыр мирас пӧд.