МАМУК

Тотшкӧдчытӧг некор ме
Керкаӧ ог пыр.
Жугыль мамук пукалӧ
Ӧшинь дорын пыр.

Коркӧ вӧвлӧм кудриас
Тырыс еджыд сі:
— Виччысьнысӧ эм кодӧс —
Витӧнӧсь ӧд ті...

Пачыс важӧн ваймӧма.
Руалӧ пӧсь нянь.
Кор и ставсӧ вевъялӧ
Быдтор сяммысь ань?

Шензьӧм вылӧ ышловзяс:
— Оз нин вермы ки!
Ставныдлы мед тырмис жӧ —
Витӧнӧсь ӧд ті...

...Тотшкӧдчытӧг некор ме
Гортӧ ог и пыр.
Мамук еджыд вольпасьын:
Висьӧ зэв нин дыр.

Вӧйӧм, вазьӧм синъясын
Нориник, лӧнь би:
Видлынысӧ некодлы.
Витӧнӧсь ӧд ми...