НАМЫРЛА

Эжва веркӧс шыльыд кутшӧм!
Пыжным шуньгӧ чӧла.
Намырла ми тэкӧд вуджам
Рытнас мӧдлапӧлӧ.

Мунам ылӧ видзьяс дорысь
Бӧръя зорӧд весьтӧд,
Аддзам дзусӧ тӧдса борйысь —
Ок, и вотчам сэсьтӧ!

Намыр, намыр, чӧскыд вотӧс,
Соддзӧ тӧртӧм розъяс.
Медым ӧдйӧджыка содас,
Ӧкта тэнад дозйӧ.

Ваймас кыа кельыд биӧн —
Вӧлись петам сьӧртысь.
Сотчысь вом доръясным миян
Намыр кодь жӧ гӧрдӧсь.