ТУЙ

Зыбуч, гуранӧсь лудкӧд,
Кытчӧ кок кӧть эн сюй,
Орччӧн пуктісны будка, —
Тані лоас пӧ туй.

Весиг вензисны ас йӧз,
Мыйкӧ артмас нӧ — оз:
Мед кӧть вынаӧсь мазъяс,
Тан ӧд нюр, абу кос.

Выльӧн писькӧдӧм трактыс
Эз, дерт, ачыссӧ лок:
Лун и вой вына трактор
Тілис-вӧчис туй бок.

Сэсся кыпӧдчис насып,
Сэсся кисьтісны из,
Медым ытва эз разӧд,
Кодыр ойдылӧ вис.

Удж кор помасис татӧн,
Эз и казявлы сикт:
Водзӧ муніс бригада
Став машинанас дзик.

Коли будка да пачыс —
Шойччан-шонтысян поз.
Пырӧ йӧзыс век татчӧ
Аттьӧ висьталігмоз.