ГӦСТЯ

Ӧтчыд муні пемыд-пемыд вӧрті,
Видзӧда да, Ёма-баба бӧрдӧ.
— Мыйла нӧ тэ бӧрдан, Ёма тьӧтка,
Мыйла нӧ тэ пемыд вӧрас ӧткӧн?
— Да ӧд менам абу весиг ёртыс,
Некод дзик оз корлы ворсны гортас.
— Бабушӧйлы ворсысь, вӧлӧм, колӧ?
Гӧститны тэ ме дорӧ вай волы.
Сета медся-медся чӧскыдторсӧ,
Колӧкӧ, и гораньысь на ворсам.
— Но ӧд нинӧм козин пыдди абу, —
Бара нормис-бӧрддзис Ёма-баба.
— Нем оз ков, — ме бурӧдышті сэки, —
Рос вылад кӧ лэбалыштам тэкӧд.