ТӦЖДЫСЬЫСЬ ПӦЧӦ

Кодыр вуджим поскӧд —
Аддзим уна ёскӧс.
Ва веркӧсын — арпиян,
Пыдіджыкын — йӧршпиян,
Кокчӧр ваын — мыкпиян,
Гуринаяс тшӧтш.

Налимъяс да ёкышъяс
Тонӧ, кыркӧтш бокышас.
Сынпиян да компиян
Сэн, кӧн лыа кӧдж.

Бара вуджим поскӧд —
Кӧні нӧ став ёскыс?
Мыйла вуджӧр сайын
Лӧнис йирыс тайӧ?

Турун пиысь быйкнитіс,
Омӧль синнас кыйкнитіс
Пӧрысь пӧчӧ-сир.
— Аттӧ ёна дурӧны,
Быттьӧ гудыр гуранын.
Вӧтлі вильыш ёсъяссӧ,
Со и лӧнис йир.

Ичӧт сирпи узьӧ,
Колӧ овны гусьӧн,
А со тані лунтыр
Унпӧтыс оз шед.
Мед став ёскыс, инӧ,
Петӧ паськыдінӧ,
Гыбалӧ да ворсӧ
Сэні пӧттӧдз мед.