НИМ

«Меным ас туяс кажитчӧ кӧин...»
Г. Юшков

	Менӧ нимтісны кӧинӧн талун,
	А ме паныд эг шу кыв ни джын,
	Татшӧм нимыд кӧть сьӧлӧм оз малав,
	Татшӧм нимсьыд кӧть нэмтӧ он мын.
Йӧзыс важысянь чайтӧны: кӧин —
Ыджыд горшлуна, скӧрлуна лов.
Збыльысь, вӧлі кӧ кидӧн да вӧйӧн,
Сэки пармаас эськӧ эз ов.
	Мыйла кӧритны, сюсь кӧ да винёв,
	Кынӧмпӧттӧ ӧд корсьӧ быд гаг.
	Сылӧн олӧмыс — гыжъяс да пиняс,
	Сійӧ пон мозыд быдтор оз лак.
Мукӧд зверыс, кор тӧдӧ, мый кулӧ,
Кыйсьысь инмас кӧ пулянас стӧч,
Юрсӧ сюйӧ сук вужляяс улӧ.
А ӧд кӧиныд тадзи оз вӧч!
	Бӧръя эбӧссӧ чукӧртас сійӧ,
	Да и смертьыслы паныд — оз тір...
	Аттьӧ Енмыслы, меным кӧ сиас,
	Медым кӧин кодь вӧлыштіс вир.