ГӦСТЬ

Уна вежӧса батьлӧн керкаын
Гӧстьӧс виччысям зэв нин дыр.
Сӧмын та гӧгӧр сёрни бергалӧ,
Кӧть эз ставлӧн и гажыс быр.
	Ӧти семьялы, ӧти котырлы
	Тайӧ гӧстьыс и бур и лёк.
	Олӧм катовтчас эськӧ кодарлань?
	Ваяс шуд сійӧ али шог?
Кодкӧ зумыш, а кодкӧ сералӧ —
Татшӧм здукӧ тай воштан ин.
Локтас Ягмортӧн либӧ Пераӧн —
Ставлӧн гӧсть вылӧ аслас син.
	Уна вежӧса батьлӧн керкаын
	Гӧстьӧс виччысям бура дыр.
	Венсьыс керканым киссьӧ-жеркалӧ,
	Гӧстьыд повзяс да оз и пыр.