ВЕСЬКОДЬЛУН

Войпока да Лунпока,
Вапӧлка да Дзоль —
Вой бокас и лун бокас,
Вӧрын и кӧн ёль,
Нюркӧд орччӧн, керӧсын —
Быдлаын тэ дзик
Юковтчӧмыд керасӧн
Ичӧт коми сикт.
Тані важӧн овлісны
Сюсь да уджач йӧз,
Парма паськӧм новлісны,
Вердіс парма чӧс.
Ытшкисны покосъясын,
Вӧдитісны нянь,
Нималіс колхозъясын
Мужичӧй и ань.

Ӧні — вӧрыс гежӧдмис,
Гӧгӧр туй да пос.
Медым талань кежӧдны
Ордым эм, и кос.
Сӧмын оз тай унаӧн
Кутны талань пыр,
Грездыс шогӧ сунӧма,
Гажтӧм, пемыд пыр.
Эновтісны, мунісны
Мужичӧй и ань,
Керкаясыс вунісны,
Абу пон ни кань.
Волывлӧны вотчыны,
Кыйны чери, ур.
А вот овны кольччыны
Кӧсйысьыс оз сюр.
Кураласны, нуасны
Ставсӧ. Да и шань.
Аттьӧ кӧть мед шуасны
Мужичӧй да ань.
Кыйкнитласны веськодя:
Со пӧ — эндӧ видз,
Вына муыс. Веськыдыс —
Вӧрсялӧ жӧ сідз.
— Ми районын, каръясын
Тэчим-чӧжим поз.
Деревняад — аръясын,
Векджык шойччигмоз.
Йӧвнад-яйнад могмӧдны —
Мед совхоз оз узь.
Сылӧн муяс шогмӧны,
Паськыд эм и кузь.
Сылы вына тракторъяс
Отсасьӧны пыр,
Да мелиораторъяс
Бертӧны пу-мыр.
Вунӧм сиктысь омӧля
Йӧзлӧн бырӧ гаж.
Сійӧн — йӧрын понӧльяс,
Шорын — сісьмӧм краж.
Сійӧн — тасъяс ӧшиньын,
Сійӧн — пелысь пу
Копыртчӧма-ӧшйӧма
Тэлань, эндӧм му.
Раскерӧс да Вӧркерӧс,
Краснояр да Вань...
Мый нӧ эськӧ бӧр керам
Мужичӧй да ань?
Мед крестьянскӧй овмӧсным
Ловзяс-югзяс бӧр.
Мед эз миян ловъясным
Эндыны, кыдз йӧр.