МЕ ЮСЬЛЫ МОЗ ТЭНЫД ЭСКА

Ме юсьлы моз тэныд эска,
Да пола варышысь моз.
О, вӧлім кӧ ӧткодьӧн, эськӧ
Ми важӧн нин лӧсьӧдім поз.

Тэ дозмӧр моз вунӧдлан асьтӧ,
Но тар моз на вежлалан дум.
Ме кора: вай важсӧ эн казьтыв
Да дзебыштлы ворсӧдчан нюм.

Дзик байдӧглысь босьтӧмыд мичсӧ.
Но синмыд тай кутшлӧн кодь ёсь.
Эн медводз кӧ видзӧдлы сідзсӧ,
Сэк менӧ, дерт, кыйны эз позь.

Ме юсьлы моз тэныд эска,
Да пола дзик варышысь моз.
Тшӧтш вӧлі кӧ лэбач кодь, эськӧ
Ми важӧн нин лӧсьӧдім поз.