КЛЮЧ

Дзик пристань весьтас Усть-Куломын
Эм кӧдзыд ваа сӧстӧм ключ.
Быд ветлысь — пӧрысьыс и томыс —
Тан веськӧдӧны горш да мудз.

Вит воськов сайын Эжва кывтӧ,
Но сэтысь некоді оз ю:
Ӧд катер-пыжъяс понда вывті
Сьӧд няйтӧдз гудыртчӧма ю.

А ключас ваыс кӧдзыд-кӧдзыд,
А ключас ваыс — ма оз ков.
Руд лыа костӧд пычкысь сӧдзыс
Кӧть тӧв, кӧть жар — век лэптӧ лов.

И теплоходвывса тшап юнга
И дебаркадерса сюсь кок
Оз юӧ, ключӧ дозсӧ дзумгӧ
Да нуӧ пуны шыд ли рок.

И ме тшӧтш васӧ татысь юла
Пинь пыр, мед кӧдзыдыс оз сот,
И, овлӧ, бергӧдчыла юлань
Да думысь: «А ӧд коркӧ, — шула, —
И тэнад сӧдз жӧ вӧлі от».