ГОЖӦМЫН

Петісны покосӧ ая-пиа,
Водзас сувтіс нырвизь кутны бать.
Пелька ворсӧ гӧрбуш зумыд киын,
Ӧвтыштас — и водас турун прать.
Мичаа да ӧдйӧ артмӧ уджыс:
Діаласны видзсӧ гоз-мӧд здук,
Сэсся батьыс мӧдлаӧ нин вуджас —
Пиыс сяммас, туруныс кӧть сук.

Швуч да швич — и тадзи лысва усьтӧдз...
Сувтыштласны горш веськӧдігмоз,
Артыштасны видзлысь пасьта-кузьта,
Лэчтан изйӧн косаӧ — гульс-гольс,
Сэсся бара дзоридзьяслы копыр,
Муӧдз копыр тэныд, лышкыд видз,
Морӧс судта дзоридз пӧвстӧд собиг
Страдна кадад он тай тӧдлы лич.

Но а рытнас, кодыр ваймас пывсян,
Корӧсь пӧжас мудзӧм кок да ки.
Сэсся лӧньӧм сикт пасьтала кывсяс:
Кодлыкӧ тай лӧсьыда жӧ сьывсьӧ —
Батьлӧн гудӧк улын сьылӧ пи.