КАЛЯ

Вӧрысь лэччигӧн аддзывлі со мый:
Каля — Эжвалӧн нэмчӧжся мич —
Котлопункт дорын кокаліс помӧй,
Ставыс вунӧма, асьсӧ эз видз.

Апрель тӧлысь на, буракӧ, вӧлі,
И эз эскыссьы весигтӧ мен:
Юыс узис на йи улын чӧла,
Катша, думышті, кокасьӧ сэн.

Но кор вӧр весьтӧ лэбачыс качис,
Збыль тай вӧлӧма, абу вӧт —
Медводз лунвылысь воис татчӧ,
Со и шедӧдӧ кынӧмпӧт.

— Коньӧр каляӧй, мыйла вежин
Ассьыд таланьӧ локтан кад?
Ӧні пӧткӧдчан сэсся пежӧн,
Сылань дзорган, кӧн ю и вад.
Лэбач вочасӧ быттьӧ шуис:
— Помӧй абу, дерт, сёянтор,
Но ӧд быдтор дзик чужан муад
Шудлань-шоныдлань кыскӧ-нуӧ,
Аслад вынъяслы эскан кор.