ПЫЖӦН

Лайкыда жӧ визув юыс нуӧ.
Мудзи сынны. Бергӧдлыштас мед.
Тӧдтӧм вуджӧр вӧтчӧ, но оз суӧд,
Ордйӧднысӧ ачымӧс ог сет.

Быттьӧ зарни сявкнитӧма кодкӧ
Юлӧн отас, доймӧ весиг син.
Вынӧн вензя кывтысь теплоходкӧд:
— Меысь водзын веркӧссӧ эн поткӧд,
Эн вай гыав, зарни мед оз чин.

Киӧ пелыс — и пыр водзӧ, водзӧ,
Лыа кӧдж, то изъя джуджыд кыр.
Эг кӧ тэрмась, ыркыд васьыс соддзӧн
Кодзувъяссӧ ӧкті упруг тыр.