Ю ЗАВОДИТЧАНІНЫН

Со тай Эжваыд...
                             быттьӧ вис.
Сёльгӧ лайкыда, оз и тэрмась.
Весиг арӧса кага
                             из
Мӧдлапӧлӧдзыс лыйны вермас.
Регыд, ытваыс усяс кор,
Юыс нӧшта на ичӧт лоӧ.
Мый и шензьыны: кывтӧ шор,
Мед нӧ кывтӧ да сёльгӧ...
                                      но ӧд
Ӧтчыд кӧмкоттӧ пӧрччыв вай,
Кевлы косьтӧдыс, из под вылӧд,
Видлы, ю паныд тадзи кай,
Да мед воськов джын бӧр эз кылӧд.
Он ӧд вермы! Эм гуся вын
Тайӧ ваыслӧн, мый кӧть шуан.
Коркӧ помӧдзыс кывтлы-сын,
Аддзан: шорсяньыс саридз туӧ!