ВЕРСТЬӦ СИНЪЯСӦН

Лоис лӧнь ворсан пельӧсын. Тан
Мудзӧм пиуклӧн гӧлӧсыс ямис.
Ӧти чукӧрысь акань да танк
Пуктіс джаджйӧ Андрюшалӧн мамыс.

Лунтыр джодж шӧрын муніс пӧсь бой,
Бомба потласис, лыйсис «Максимка»...
Друг кӧ «ранитчас» юр либӧ сой,
Аслыс ичӧт салдатыслы нимкодь.

Челядь, челядь, и мыйла нӧ пыр
Война ті воклы — медмуса ворсӧм?
Чача танксӧ ог вунӧд ме дыр:
Кор тай аканьсӧ муртса эз зыр,
Акань быттьӧкӧ «мамукӧй!» горзіс...