ВЕРМӦМ

...Но сувтіс вирӧн ойдӧм политрук
Да воськов бӧрся воськов враглы паныд.
А сынӧдыс свинечысь вӧлі сук,
И ыркыда быд пуля ӧвтіс банӧ.

Кӧть роталӧн гранатаыс эз коль,
Патроныс бӧръя — век жӧ тырмис эбӧс,
Збой командирӧс пельпом саяс дзебис,
«Ураӧн» водзлань биыс вылӧ лэбис,
А ротаын боецыс вӧлі... нёль.

Кор лӧнис эрд да лыйсьӧм лоис шоч,
Бӧр косісны грузин, узбек да роч,
Кӧн муыс бойсьыс пыр на вӧлі дон,
Кӧн куйліс политрукныс — коми зон.

Скӧр пон моз эргиг, кылӧ, пышйӧ враг,
А гӧра весьтын дӧлалӧ гӧрд флаг...
«Ми вермим — эгӧ?» — зонмыд восьтіс син,
— Победа, другӧ, — копыртчис грузин.
— Победа! — ӧти кывйӧн роч, узбек.
— Ми вермим! — коми зонмыд нюмдіс сэк.