АС МУ

Йӧз муӧн велалім ми шуны ылі му,
Мӧд карӧ ветлам кӧ, то кайтам: вӧлім йӧзын.
И збыль ӧд — кокыд мӧдарӧ оз ну,
А кыскӧ талань, кӧні тӧдса ӧзын.
        Но мыйла йӧзын?!
                               Коми и Тюмень,
Шӧр Азия, жар Крым да кын Аляска —
Дзик ӧти Рӧдина, быд пельӧс муса мен,
И быдлаын жӧ шаньӧсь-бурӧсь аскӧд.
Дерт, абу гусятор: оз аддзы сьӧлӧм ин,
Кор гортӧ воа вӧлӧк вуджӧм бӧрын,
Мен сывъяс восьтӧ ичӧт чужанін,
И сӧстӧм радлун морӧсӧ он тӧрӧд.
Лӧз саридзланьӧ лӧня кывтігтыр
Тадз ойдӧ Эжва лыдтӧм ёльнас-виснас.
И буретш ичӧт чужанінӧй пыр
Ме йитчи тэкӧд нэм кежлӧ, Отчизна!