ОВЪЯС

Расовъяс, Морохинъяс, Поповъяс
Миян сиктын медся тӧдса овъяс.
Ёна пыдын тіян рӧдлӧн вужныд, —
Нэмъяс сайын енмыс сетліс чужны.
Нэмъяс чӧж и нимӧдінныд асьтӧ,
Гӧрид-кӧдзид, кыдзи нӧ он казьтыв?
Кыдз оз казьтыв: выль олӧмсӧ дорны
Эз тай ковмы копрасьӧмӧн корны.
Октябрь вӧсна пуктінныд том ловъяс
Расовъяс, Морохинъяс, Поповъяс.
Воис кад, и мӧд войналӧн биыс
Батькӧд орччӧн чишкаліс тшӧтш пиӧс.
Эз и венны пежӧс сэки, эз кӧ
Быдӧн наысь югыд лунӧ эскы.
Югыд лунсӧ дорйисны тай найӧ,
Ставныслӧн Победаын эм пайыс.
Медым шудсӧ эз нин вевттьы сьӧдыс,
Талун зільӧ сиктса куим рӧдыс.
Бур пример кыдз уджавны да овны,
Сё ов пӧвстын налӧн прӧстӧй овныс.
Та вӧсна и медся тӧдса овъяс
Расовъяс, Морохинъяс, Поповъяс.