ӦНІЯ НАЛОГ ИЛИ ВАЖ ВУЗ ВОТ УНДЖЫК

Крестьянакӧд ас костын сёрнитан да пыр кылан норасьӧм: Сӧветскӧй власьтыд пӧ джагӧдны пондіс быдпӧлӧс налогӧн, а войдӧр пӧ вӧлі мынтыштан воттортӧ деньгаӧн и некод сэсся тэнӧ оз юавлыв. Да, ӧти ногӧн крестьяна правӧсь: збыльысь перйӧны уна пӧлӧс налог и кажитчӧ нин: став налогыс кайӧ зэв уна. Ме нарошнӧ арталі кык мортлысь — уна-ӧ найӧ мынтісны таво налог, вося налог, и со мый петіс: ӧтиыслӧн мынтӧма 5 пуд 15 пунт нянь, 4 пунт вый и деньгаӧн куим миллион, а мӧдыслӧн — 1 п. 15 пунт нянь, деньгаӧн ӧти миллион и гужналог квайт лун, нывбаба. Сюлӧн дон ӧні дас кык миллион, выйлӧн — кык миллион, миллион деньга лоас воча куим пунт да джын нянькӧд, а гужналог нывбабалы 15 пунт няньӧн лун; войнаӧдз дон няньлӧн (сю) вӧлі чӧлкӧвӧй пуд. Сэсся тайӧ став налогсӧ ме пӧрті няньӧ и войнаӧдз дырся донӧн — чӧлкӧвӧйӧн пуд — сувтіс став налогыс: первоя мортыслӧн 6 руб. 62½ к., а вося вотсӧ сійӧ мынтывлӧма 8 чӧлкӧвӧй; мӧдыслӧн — 3 руб. 83 к., мынтывлӧма 4 чӧлкӧв. Арталі да со мый петіс: этшаджык на важ вот дорысь. А пыр увгӧны весьшӧрӧ. Важ вот вӧвлі унджык и мынтывлісны шы ни тӧв. Ме ногӧн, Сӧветскӧй Правительствоыслы бурджык вӧлі эськӧ перйыны став налогсӧ важ моз деньгаӧн-вотӧн да деньга вылас и лӧсьӧдны мый сылы колӧ; сэки эськӧ некутшӧм увгӧм крестьяналӧн эз вӧв, и этшаджык вӧлі удж, и этшаджык ковмис налог веськӧдысь начальство. Ме чайта, недыр мысти тадзи и лоас.

Коми пи.