ВИТ ВО ОКТЯБРСА РЕВОЛЮЦИЯЛЫ

Вит во сайын, талунъя лунӧ Россияса уджалысь йӧз мездысисны озыръяс кабыр улысь да босьтісны власьт аслас киӧ.

Вит во нин му вылын олӧ миян Сӧвет Республика.

Эз кокньыда шед гӧль йӧзлы мездысьӧм! Ставмувывса озыръяс кыпӧдчисны Россия вылӧ, лэптісны война, кӧсйисны бырӧдны Сӧвет Республикаӧс. Сувтіс сэки ӧтвылысь уджалысь йӧз дорйысьны да шуис: «Кулам кӧть — огӧ сетчӧ бӧр озыр кипод улӧ!» Мывкыда, повтӧм сьӧлӧма Гӧрд Армия миян нёль во пӧшти водзсасис озыръяскӧд, вермис ставнысӧ найӧӧс, перйис уджалысь йӧзлы мир — уджавны кӧзяйство дорын.

Ыджыд аттьӧ да вунлытӧм бур слава Гӧрд Армиялы!

Тайӧ колян (витӧд) воыс вӧлі мирнӧй во. Став Россия сьӧлӧмысь кутчысис кӧзяйство кыпӧдны, эмбур содтыны.

Сизим вося война бӧрын Россия миян зэв ёна гӧльмис; сэтчӧ шӧрӧ ещӧ мӧйму суис ыджыд шог — тшыглун. Мукӧд государствояс эз отсавны миянлы; озыр государствояслы зэв прӧтивнӧ видзӧдны мужик власьт вылӧ — миян Сӧвет Республика вылӧ. Быть лои Сӧвет власьтлы кӧзяйство дор кутчысьны аслас вынӧн, Россияпытшса вынӧн. Сы понда лои лӧсьӧдны кутшӧмсюрӧ налогъяс. Ӧні миян Россия лунысь лунӧ ёнмӧ, вочасӧн пыр кӧзяйство миян кыптӧ.

Уна кокньӧд нин, мый позис, Сӧвет власьт вӧчис уджалысь йӧзлы и таво (витӧд во вылын). Водзӧ кежлӧ сідзжӧ кутас, эмбур содӧмӧн тшӧтш, лӧсьӧдны кокньыдджык олӧм.

Сӧвет Республика, Россияын кындзи, некӧн абу; быдлаын власьтыс озыръяс ордын, быдлаын найӧ жмитӧны уджалысь йӧзӧс. Сӧвет Республикаын власьт сӧмын уджалысь йӧз киын — крестьяна да рабочӧй киын.

Сӧвет Республика сетіс права мукӧд сёрниа йӧзлы (тотаралы, чувашъяслы, вотякъяслы, комилы и мукӧдлы) лӧсьӧдны бурджык олӧм ас ногӧн, кыпӧдны кӧзяйство ас олӧм серти, велӧдчыны быд наукаӧ ас кывйӧн.

Мед олас, мед ёнмас Сӧвет Республика!

Медвойдӧр шуис Сӧвет Республика восьтыны Россияса коммунист партия. Тайӧ партияыс лыддьыссьӧ юрӧн («нырщикӧн») Ставмувывса Революциялӧн (Всемирной Пролетарской Революции).

Быд государствоын нин ӧні эмӧсь коммунист партияяс. Найӧ ставыс ӧтувтчӧмаӧсь (март тӧлысьын 1919 воӧ) ӧти чукӧрӧ — Интернационалӧ (III‐й Коммунистический Интернационал). Му пасьтала коммунистъяс вермасьӧны озыръяскӧд, мездӧдӧны уджалысь йӧзӧс, матыстӧны Ставмувывса пролетарскӧй революция.

Талун самӧй Мӧскуаын воссьӧ нёльӧд съезд ставмувывса коммунистъяслӧн (4 Конгресс Коммунистического Интернационала).

Сьӧлӧмсянь бурсиам 4-ӧд Ставмувывса коммунистъяс съездлы!

Мед содасны му вылын коммунист партияяс! Мед регыдджык лоӧ быдлаын Сӧвет власьт!

Сьӧлӧмсянь мӧдӧдам зэв ыджыд чолӧм (привет) рытыввывса уджалысьяслы, Россияса Республика дор сулалысьяслы!

Коми войтыр! Квайтӧд во вылӧ петігӧн вайӧ жӧ шуамӧй:

«Ӧтвылысь отсавны Сӧвет власьтлы; зільджыка лӧсьӧдны кӧзяйство; регыдджык кыпӧдны пабрикаяс да заводъяс (промышленность); ӧдйӧджык петны сьӧкыд олӧмысь!»

Ми вермим война вылын — вермам и кӧзяйство вылын.

Видзӧдӧй сюся, мед горш озыръяс некыдзи эз вермыны топӧдны уджалысь йӧзӧс кӧзяйство кыпӧдігӧн!

Абу нин став муыс ӧні озыръяс улын; квайтӧд юкӧныс (Россия) мездысьӧма нин наысь.