СО ӦД КӦНІ ПЕМЫД ОЛӦМЫС!
Межадорын неважӧн кулӧма ӧти коммунист — Давыдов Микайлӧ Петрӧвич. Дерт, коммунистӧс дзебисны тӧварышъясыс поптӧг, вичкоын сьылӧдтӧг: коммунистъяс оз веруйтны енлы ни омӧльлы.
Ӧні сэсся пемыд йӧзыд Давыдов йылысь быдсяма сёрни лӧсьӧдалӧны.
Ӧти баба, Грездса Ӧдя Морозова, со мый висьтавлӧ: «Муна пӧ ӧтчыд рытын Давыдов керка дінті. Друг пӧ ӧшинь увсьыс бырскӧбтіс пон да кутіс вӧтчыны ме бӧрся. Асланым рыныш дорӧдз пӧ мыйӧн вои — понйыд друг пӧртчис Давыдовӧ... Не кӧ пӧ рынышӧй, джагӧдіс пӧ эськӧ менӧ...»
Кутшӧмкӧ Илля Ӧдя Куликова со мый сӧрӧ. «Гуяс дорӧд пӧ оз позь весиг некодлы мунны, пыр пӧ Петыр Микайлӧ (Давыдов) повзьӧдчӧ. Сійӧ пӧ гу вылас и пукалӧ пыр да норасьӧ „менӧ пӧ — шуӧ — татысь вӧтлӧны, сьылӧдтӧг дзебисны да...“»
Мукӧдыс ещӧ ёнджыка на лӧсьӧдлӧны быдтор та йылысь. Ӧти мужик, Нюрысь, Прокор Морозов, шуӧ: «Давыдовлысь пӧ ловсӧ дявӧл босьтіс. Сійӧ пӧ Степан Великӧйлысь (ӧбразысь) ризісӧ кулис да Степаныд пӧ и накажитіс сэсся...»
Ок, думыштан да, ёна жӧ на миян пемыд йӧзыд! Мыйсӧ он кыв деревнясьыд! Коммунистъяс йылысь вывті нин ёна быдторсӧ лӧсьӧдаласны! Кыдзи нӧ кулӧм морт вермас понйӧ пӧртчыны? Кыдзи нӧ кулӧм морт гу вылын вермас пукавны? Прӧстӧй больгӧм-сӧрӧм тайӧ!
Абу ӧд ӧти Межадорын сӧмын коммунисттӧ сьылӧдтӧг дзебӧма: Россия пасьтала мыйта куйлӧны найӧ! Некодӧс абу сьылӧдӧма. Мыйла нӧ некӧн оз повзьӧдлыны? Со тай нӧ миянын, Сыктывдінкарын, эм ӧтувъя гу, сюйӧма сэтчӧ сьылӧдтӧг жӧ дас нёль мортӧс; мыйла нӧ шы ни тӧв куйлӧны? Дас нёльнад кӧ кутісны горзыны, став карсӧ повзьӧдісны.
Прӧстӧй баба сёрни, сэсся нинӧм. Оз ков лёк сӧрӧмъяс кывзыны! Бабаяс мукӧддырйи повзясны мыйыськӧ да весиг потшӧс-майӧг кажитчас налы дявӧлӧн!..
Сэсся, кыдзи нӧ Степан Великӧй вермис Давыдовӧс накажитны? Ризіяс (эзысь да зарни) кулисны быдлаын, Россия пасьтала, — тшыгъялысь йӧзлы нянь босьтны сы вылӧ заграничаысь. Мыйла нӧ сэтшӧм «дивӧыс» лои сӧмын Межадорын? Мыйла енмыс эз накажит быдӧнӧс, кор кулисны ризіяссӧ Спасительлысь, Божья матерлысь да мукӧд гырысь святӧйяслысь?
Мыйла нӧ либӧ эз ки-кокъяссӧ йӧзлысь чегъяв енмыд, кор мощияс видлалісны? Сэки ёнджыка вӧлі позьӧ...
Сэсся, накажитны кӧ колӧ вӧлі — мыйла Степан Великӧйыс Давыдовсӧ места вылас эз ви? Давыдов — миян кодь морт жӧ, висис да кулі. Сэні некутшӧм дивӧ абу.
Ставыс тайӧ сӧрӧмыс мунӧ асланым пемыдлун вӧсна.
Кад нин коми йӧзлы югдӧдчыны! Вит во нин чуксалӧны миянӧс коммунистъяс велӧдчыны, эновтны важ пемыд олӧмсӧ да югдӧдны юр вемнымӧс.
Ставыс уджалысь йӧзлы ӧні восьса.
Велӧдчӧй, югдӧдчӧй, вокъяс!
