* * *

Шонді улын эм на олан руыс,
Нэмсӧ шогыс сёйӧмӧн оз сёй.
Бара зараваа лоис пуыс,
Бара сьыланкывъя лоис вой.

Шонді улын эм на олан руыс,
Нэмсӧ изйыс юр вылӧ оз усь.
Бара пыжа-пуръя лоис юыс,
Бара чужан муа лоис юсь.

Шонді улын эм на олан руыс,
Нэмсӧ дойыс нюкырӧн оз видз.
Бара вӧла-гӧръя лоис муыс,
Бара коса шыа лоис видз.

Шонді улын эм на олан руыс,
Век ӧд лёкыс пемыдын оз кут.
Бара сьӧлӧм шоныд гыӧн туис,
Бара шудӧн тырис морӧс куд.