СОРТОВКА

Матыстчӧ тӧв, локтӧ сортовка лэдзан кад. Войдӧр коми йӧз ёна уджавліс сортовкатӧ. Колӧ лӧсьӧдчыны и таво кежлӧ. Ӧні неуна кӧзяйство гӧгӧр справиталӧма нин этша, позьӧ думыштны и нажӧтка йылысь. Коми муын вӧр лэдзӧм, дерт, медыджыд нажӧтка.

Таво унджык сортовка лэдзӧм лоӧ «Северолессянь». Кӧсйӧ лэдзны витсё ветымын сюрс (550.000) кер да ветымын сюрс (50.000) шпал. Та мында вӧрыс юксьӧ со кытчӧясӧ:

Вымскӧй (Емваса) участокӧ ....... 100.000 кер.

Усть-Немскӧй „ ....... 55.000 кер.

Висер вож ....... 60.000 кер да 5.000 шпал.

Усть-Сысольскӧй „ ....... 65.000 кер да 25.000 шпал.

Визинса „ ....... 70.000 кер да 5.000 шпал.

Койгортса „ ....... 100.000 кер.

Лузаса „ ....... 100.000 кер да 15.000 шпал.

Таысь ӧприч, кык лесничество — Помӧсдінса да Эжваса (Вычегодское) — сетсьӧны заграничаса фирмаяслы, удитасны кӧ найӧ лӧсьӧдчыны: Помӧсдінса лесничествоыс — Шалитлы (англичан) сё ветымын сюрс (150.000) сортовка кер лэдзӧм вылӧ, мӧдыс (Вычегодское) — Альциуслы (голландечлы), сё сюрс (100.000) кер вылӧ.

«Северолес» сортовка лэдзӧм видзӧдны пуктӧма кык уполномоченнӧйӧс: ӧтикыс кутас овны Сыктывдінкарын, сы улын лоӧ став участокыс, Лузаса кындзи; мӧдыс — Абъячойын, сы улын лоӧ Луза вожӧд вӧр лэдзӧм. Тайӧ — медгырысьясыс; на кындзи быд участокын лоӧны, важ моз жӧ (кыдзи войнаӧдз вӧвлі), агентъяс да нарадчикъяс.

Сортовка лэдзысьяскӧд мынтысьны «Северолеслӧн» вайӧма нин Сыктывдінкарӧ зэв уна тӧвар: нянь, зӧр, чери, сакар, мануфактура да струментъяс.

Коми йӧз олӧ вӧр пиын. Нэмыс нин уджавліс сортовка дінын. Колӧ и таво кутчысьны бура: ӧти-кӧ, таво турунъяс бурӧсь, вӧвъяс справитчыштісны, уджавны кокньыдджык нин лоӧ; мӧд-кӧ, ёна позьӧ таво нажӧвитны. Коді зіля сортовка дорӧ кутчысяс — лоас пӧт, пасьтасяс и кӧмасяс. Таысь бур нажӧтка ӧні, дерт на, сэсся оз сюр.

Энӧ прӧзевайтӧй, коми йӧз!