ВЫЛЬГОРТСА ОЛӦМ-ВЫЛӦМ

I. Чулькъя-мылькъя на кытсюрӧ

Исполкомын служитӧмысь ӧні быдӧн ӧткажитчӧны. Быдӧн шуӧны: «Ог пӧ куж, зэв пӧ сьӧкыд да, нинӧм пӧ оз сетны да...» Войдӧр вӧлі мырдӧн, юктасьӧмӧн сюйсьӧны. Неважӧн на вӧлі миян вӧлӧстнӧй съезд — бӧрйыны служба вылӧ председательӧс да шленъясӧс; ӧдва вермим бӧрйыны куим шленӧс. На пытшкысь пӧ колӧ ӧтилы секретаравны. Бӧрйӧм йӧз — ставныс зэв ичӧтик грамотааӧсь, — коді жӧ пондас секретаравны? Дерт, буракӧ, исполкомыд пӧдласяс секретартӧгыд... Велӧдчӧм йӧзсӧ мыйлакӧ оз бӧрйыны, буракӧ полӧны сӧветскӧй власьт дор олӧмысь.

Продналог перйигӧн быдӧн шуӧны: «нянь пӧ абу», а праздникъяс вылӧ пыр эм. Таво быд десятаын миян лӧсьӧдісны выль праздник: «Колӧ пӧ, шуӧны, благодаритны енмӧс да Илля-пророкӧс бура нянь да турун вайӧмысь». Поп-дяклы, дерт, сійӧ и колӧ, сы вылӧ и радӧсь! Вичкоын либӧ крест дорын найӧ вӧчыштасны бур-бор и... бара зепныс тыр, да ещӧ сэтчӧ ведра сур (канун) да пуд-мӧд-коймӧд нянь нуасны. Найӧ мунӧм бӧрын йӧз пондасны юны канун, ректасны не ӧтик доз, сэсся ӧткымыныс юыштасны на и самӧкур гажмытӧдзныс, косьӧдз. Тадзи со и благодаритӧны ентӧ да Илля-пророктӧ...

II. Казялісны

Миянын унджыкыс ремесленнӧй йӧз.

Войдӧр йӧзлы нажӧтка кокньыда шедлывліс, нянь вайлывлісны уровйӧ, вӧвлі донтӧм. Сы вӧсна видз-му дінӧ йӧзыд эз кутчысьлыны прамӧйджыка.

Кор лои война, сэсся революция, — нянь бокысь эз пондыны вайны, катыдын няньяс быри, босьтны лои некытысь, нажӧткаяс сідзжӧ усины, — сэки йӧзыд вӧлисти казялісны да овмӧс дорӧ кутчысисны.

Ӧні пӧшти быд морт уськӧдчис видз-му дінӧ: важъяссӧ кутісны уджавны бурджыка, выльысь паськӧдчыны — вӧчны муяс, видзьяс, тільсьӧны кодзувкотъяс моз. Ме чайта, во-мӧд-коймӧд мысти йӧз овмӧдчасджык, унджык пондасны чукӧртны нянь-турун, сэки овны лоӧ долыдджык да кокньыдджык. Тадзи и колӧ крестьянинлы. Ӧти артель лӧсьӧдіс нин весиг вартан машина, вартӧ кык вӧлӧн зэв бура. Тайӧ и бур, тадзи и колӧ.

Коми пи