* * *

Ылын, ылын, роч Кавказын,
Уна, уна киссис вир...
Войска водзын вӧлі варыш — 
Гӧрд апичер командир.
Сійӧ миянӧс зэв ошкис,
Сэн жӧ сетіс ён приказ:
«Мед быд киын вӧлі, вокъяс,
Выль ружйӧ да патрон дас.
Пуртӧсын мед лэчыд шашка,
Коскӧ ӧшны револьвер...
Мунамӧ ми враглы паныд,
Петкӧдламӧ налы шер...
Ставсӧ пасьям, огӧ полӧ,
Озыр понлы сэті туй,
Коді кольӧ — босьтам пленӧ,
Этшаджык мед лоӧ шуй...»
Кустъяс дорӧ надзӧн водіс
Кыз рушкуа генерал,
Кыдз пу улын рана понда
Куйліс миян коми морт.
Том бур вирыс ёна муніс — 
Кыдз пу дінсянь мӧдіс шор...
Вылын лэбаліс сьӧд кырныш,
Кыліс муысь сёянтор.
— Эн на, кырныш, ёна тэрмась,
Эз на лолӧй ставыс пет;
Лэбзьы, лэбзьы Коми муӧ,
Батьлы-мамлы юӧр сет...
Висьтав менам гӧтырпулы,
Мед оз виччысь менӧ бӧр;
Менӧ гӧтраліс тан сабля — 
Воссис зонлӧн морӧс шӧр...
— Мунӧй, мунӧй, вокъяс, водзӧ,
Став му пасьта вӧчӧй мир;
Менӧ кыдз пу улӧ кольӧй,
Мед нин петас алӧй вир.
Кыдз пу кутас менӧ тӧдны:
Улас лоӧ менам горт...
Сійӧ тӧвкӧд кутас сьывны,
Кыдзи кольччис коми морт...