* * *

Век пемыд, луныс быттьӧ абу,
Но чайта: олӧм лоас шань.
Россия — абу личкӧм баба,
Россия — доддявлытӧм чань.

Код сӧліс — сьылідзирсӧ чегас
Да водзӧ вожасьны оз кут.
Россия биа-борднас лэбас
Да корсяс сьӧлӧм тырыс шуд.

Ми асьным петам визув шӧрӧ
Да кутам сынны воысь-во.
Сісь юрӧн олӧм коляс бӧрӧ,
И йӧйыс ыджыдӧн оз ло.

И сэтшӧм кад на коркӧ воас,
Мый миян лоас ставыс тыр.
Россия вӧлі, эм и лоас,
Россия му вылысь оз быр.

Оз ло Россия йӧзлӧн рабӧн,
Оз сёй Россия йӧзлысь нянь.
Россия — абу личкӧм баба,
Россия — доддявлытӧм чань.