САР

Кӧть и мамлӧн чӧскыд йӧлыс
Ёнӧн вӧчис менсьым вуж,
Ме кӧ быттьӧ сарӧн вӧлі,
Эг жӧ йӧзсӧ видзны куж.

Гортын куимӧн и олам,
Да и то оз артмы лад.
Быттьӧ бокӧвӧйяс лолам,
Кывйын — яд и лолын — яд.

А ӧд сарыдлӧн — держава,
Государство — ыджыд му.
Гӧгӧр ставыс ува-ава,
Быть на-й чорыдасӧ шу.

Быть на-й кодӧскӧ да ӧлӧд,
Быть на-й кодӧскӧ да наль.
Сталин сійӧн Сталин вӧлі,
Сы вӧсна мый вӧлі сталь.

Сарыд кутӧмнас и оліс,
Бурӧ велӧдӧмнас да.
Усьӧм гачӧн, кусӧм лолӧн
Керка шӧрад воӧ ва.

Кодлӧн мывкыд вӧлі юрыс,
Нэмсӧ чукӧртіс Роч му.
Сэсся ӧти сюрис урӧс,
Ставлы кодйис джуджыд гу.

Эз жӧ ӧд СССР-тӧ
Шома юрӧн кисьтны ков.
Ӧні быдӧн Русьтӧ йӧртӧ,
Вунӧдӧма нянь да сов.

Сэтшӧм эськӧ сарыс колӧ,
Медым сарлӧн кодь и сям.
Коркӧ сійӧ миян лолӧ?..
Эм-ӧ сійӧс чужтысь мам?..